Thursday, December 29, 2011

KOKOMAN O KID'K'T'N KO MGA AYAT A PANTAG SA DECORATION

KOKOMAN O KID'K'T'N KO MGA AYAT A GO MGA HADITH A GO MGA NGARAN O ALLAH A GO NGARAN O NABI "SAW" KO MGA K'L'B


By: Atah P. Ibrahim

So kipandktn ko mga Ayat a go mga Hadith go so mga Ngaran o Allah a go ngaran o Nabi "saw" na di khapakay.

Giya Lujnah Da-imah sa Saudi ( Umpongan anan o mga Ala a Ulama sa Saudi ) sa kap'mamapuro-i kiran i Shaikh ibn Baz rahimahullah na pitharo iran:

[ Mataan a so kipan'dktn ko mga Ayat a go so mga Hadith a go so mga Ngaran o Allah sa pantag bo sa decoration odi na panad'ntad'm odi na iphangoyat na maka sosopak ko turo-an a go pando-an a minitalingoma o Nabi "saw" a so so galbk o mga Sahabah "ra" taman ko mga Tabi'een, na giyanan na di khapakay ]

Fatawa Lujnah Da-imah no. : 1706

Go pitharo i Shaikh ibn Al-'Othaymeen rahimahullah:

[ Mataan a so kadaklan ko mga tao na iphand'ktiran so mga Ayat sii ko mga kl'b odi na sii ko mga Sala a phagontodan, na giyanan na Bid'ah a danggalbka o Nabi "saw" a go so mga Sahabah "ra".

Opama ka ino iran ph'ndkt'n ka s'las'la iran ko Qur-an na basiran i mas mala i s'las'la ko Qur-an a diso mga Sahaba "ra"?

N Opama ka ino iran ph'ndkt'n ka aniyan siran masiyap ko mga Rarata na knaba giyanan i okit a kawasara ko mga Ayat sa kilinding'non sa ginawa ko mga Rarata ka aya pitharo o Nabi "saw" na kabatiya, pitharo o Nabi "saw" : sa tao a batiya-an yan so Ayatol Korsiyy sii ko kagagawi-i na di pagobayn a Shaitan taman sa kapita iyan.

Na Opama ka ino iran ph'ndkt'n ka aya hadapiranon na ansiran mawma a kamapiya-an na knaba anan p'd ko Islam ka sii anan maapd ko mga Bid'ah ka da manggalbk o Nabi "saw" a go so mga Sahabah "ra".

Na Opama ka ino iran ph'ndkt'n ka matag decoration na knaba giyanan i hadap ko Qur-an go kada anan a Adat ko Qur-an.

Na phamangnin ami ko mga Pagari ami a kowa-a iranon so mga Ayat go mga Hadith ago mga Ngaran o Allah a go Ngaran o Nabi "saw" a tatago-oniran odi na id'd'kt iran ko mga Kowarto na go mga Sala ka inisapar anan o Agama.

i say: So kabaloya san a Desktop background odi na Profile Picture na lagid anan sa kokoman.

KOKOMAN O KAPANOLAD GO KATHOLAD

KOKOMAN O KAPANOLAD GO KATHOLAD


Pakaisha:


Antonaa i Kokoman o Kapanolad a go Katholad?


S'mbag:

so kapanolad na Haram, tanto a madakl a Dalil sa so kapanolad na Haram, go pd sa pinaka mala i siksa sa alongan a mawri so dii manolad.

pitharo o Nabi "saw" [ أشد الناس عذاباً يوم القيامة المصورون ]

maana: Pinaka mala i Siksa sa alongan a mawri ko mga Manosiya na so mga Panonolad.

Hadith a piyanothol i Bukhari.

pitharo iyan pn [ كل مصور في النار ]

maana: langon a dii manolad na sii sa Naraka "khawlog sa Naraka"

Hadith a piyanothol i Muslim.

Gyoto so kapanolad a Using ur Hand to make an Image... using a Pen...opama.. or ung pag ookit sa mga bato o mga Kahoy... na gumagawa ka ng Imahin ng isang tao o hayop...

basta a adn a napas yan...

sabi ng Propeta "Saw" [ makawma sa alongan a mawri so panonolad na ptharoonon o Allah : tago-ingka sa niyawa a giyanan a ini tolad ka ]

Pitharo o 'A-isha "ra" [ دخل علي النبي صلى الله عليه وسلم وقد سترت سهوة لي بقرام فيه تماثيل فلما رآه هتكه وتلون وجهه وقال ((يا عائشة أشد الناس عذابا يوم القيامة الذين يضاهئون بخلق الله)) قالت عائشة فقطعناه فجعلنا منه وسادة أو وسادتين ]

maana: kiyasoldan ako o Nabi "saw" na kiyasapngan akn so pananago-ay akn sa "Qiram" Sapng a mayto ; na adn a tigiyan a matatagoon a mga Barahala / piyangmbaalan a lagid Monika, ( piyag taw taw ) na kagiya ma ilay niyan na giba iyan go miya saling a Bontal go pitharo iyan: Hay 'A-ishah aya pinaka mala i Siksa sa Alongan a Mawri na so siranoto a Phananayananiran so kiyapangad'n o Allah, pitharo o 'A-isha "ra" na piyotol ami na pimbaalan ami a Ulona odi na dowa a Ulona. "kay dowa Putol"

Hadith a piyanothol i Bukhari a go Muslim.

Aya pakaisha:

ino basan p'd so mga Camera?

Phone Camera, Digital Camera...and etc.... basa p'd a Haram p'n???

pitharo i ibn 'Othaymeen rahimahullah

knaba san p'd so Camera... so katulad sa Camera na knaba khab'thowi sa kapanolad, angkayno?

kc pinipindot m lang ung Camera...

na so image a miyakowa o Camera na knaba ska i mimba-alon ka andang d'n oto a mababaloy... na so kiyaps'langka ko Camera na miya kaowa nyan so image a gyoto a tao or hayop.

Gyoto a ini tulad ka sa Camera na mitutulad d'n odi na miya ad'n dn o Allah na gyabo a kiya copy angkawn ko Camera, na knabangka kiya sayanan so kiyapangad'n o Allah.

aya Rayagan yan na ibarat o adn a Tao a mishorat, na initolad ka a Camera so inisorat yan, so writing yan, na matago ko Camera ka minitolad ka so sorat yan na ba p'tharo-a a tao a ska i khisorat roo??? di...

i say:

adn a Taks tano sii sa Islam, [ Ruling Guidance ]

[ so "term/salita" a inosar sii ko kokoman na sii bo khap'nto "specialy" oto ko "term" a kalalayaman sii ko masa a inosaranon ]

الإصطلاح ينزل في العرف السائد في زمنه
أو فيما معناه

example:

pitharo o Nabi "saw" [ pimorkaan o Allah so mga panonolad ]

ano ang Term jan? [ panonolad ]

antonaa masa a kiya osaran san? [ masa o Nabi "saw" ]

na antonaa i kalalayaman a phagosaran sa "term" anan sii ko masa o Nabi "saw"?

[ so kapanolad a knaba Photograph, knaba Camera ]

aya kapanolad kiran gowani na drwaings, painting using something like a pen, hand by hand...

So... hnd papasok ang Photograph at mga Camera.

sabi ni Shaikh ibn 'Othaymeen rahimahullah:

ganon pa man, hnd parin pwedi ang Camera maliban lamang kung ito ay iportante, tulad ng pag a apply ngaun ng Passport, ID, and etc... kailangan mo parin mag pa Picture.

kung gagawin mo lang bilang pang display or remembrance ay hindi pwedi.

i say:

as long as na sinabi niya na hindi pasok ang Photograph sii ko kapanolad a pitharo o Nabi "saw" na angkayno di khapakay so katholad a knaba tanto a iportante?

pero mas mapiya d'n mambo a so tao na b'tadn yan a ginawa niyan, knaba lagid o p'd a oman kh'lak'lad na makatulad na direct sa facebook.

oga-id na o tholad na inshaAllah na da makasold sa angkawto a Hadith a Pimorkaan o Allah so mga panonolad.

so pman so mga Babay na Haram dn so katholad ka so babay na palaya d'n awrat.

oba p'tholad a mata bo a p'kha ilay ron na daa awida akal, na oba so awrat yan i itholad yan na Haram.

NOTE: aya Ifta i Shaikh bin Baz rahimahullah na palaya dn Haram so Tulad apiya Photograph.

Tawfikan tano o Allah ko langon a mapiya.






By: Atah P. Ibrahim

Wednesday, December 28, 2011

KOKOMAN O KISORATN KO QUR-AN SA KNABA BATANG A ARABIC

KOKOMAN O KISORATN KO QUR-AN SA KNABA BATANG A ARABIC


Pakaisha:

Ino khapakay a Isurat so Qur-an sa knaba batang a Arabic para mabatiya o di phaka Batiya sa Arabic?


S'mbag:

So bantogan na rk o Allah...

Miyagayonayon so Pat a Imam, a go so kadandan o mga Ahlussunah, go inifta o mga Ala a Ulama sa Saudi lagid i saki Shaikh bin Baz rahimahullah, a so kisorat'n ko mga Ayat sa Qur-an sa knaba Batang a Arabic, lagid o English, na Haram, di khapakay.

pd a sabap na kagiya a so kabalsa ko Arabic na mbida a goso kabalsa ko pd a basa, na isorat ka so Word a Arabic sa letra a pd a Basa na batiya-an ka na p'khasaling so kabal'sawn, na so Arabic na basta a masaling so kabalsawn na p'kha saling so Maana niyan.

Na so Qur-an na katharo o Allah, Haram oba salinga so Maana niyan, gyanan i sabap a Wajib so kapaganada ko okit a kabatiya sa Qur-an ka odingka khabals sa mapiya na p'khasaling so maana niyan na so kap'kha saling o maana o katharo o Allah na mala a dosa.

Pangnin ko ko Allah a itawfiq yan rkitano so langon a mapiya sa doniya Akhirat, Aameen.


Sompat o Pakaisha:

ah sobes so transliteration of Quran NA di kapakay???


S'mbag:

knaba bawal so Translation

Example na:

الحمد لله رب العالمين

 na knaba bawal a isurat ka sa [ SO BANTOGAN NA R'K O ALLAH A KADNAN O MGA KA-AD'N ]

 Aya bawal na o isorat ka sa [ ALHAMDO LILLAHI RABBIL'ALAMEEN ]

Rilaan tano o Allah...


By: Atah P. Ibrahim

Tuesday, December 27, 2011

MAKMPT A OSAYAN KO PARATIYAYA, BY: ATAH P. IBRAHIM


MAKMPT A OSAYAN KO PARATIYAYA, BY: ATAH P. IBRAHIM



PARATIYAYA: Aya maana a Paratiyaya na so katharo-a o Dila "a piyaratiyaya niyan so Allah" na go so kapaka ayon o Puso, na go so kinggolalan'non o anggawta, di-I magomarg sabap ko mga Simba ko Allah na go p'khadarodos sabap ko kambaradosa.

So Paratiyaya na andang so katawi tano ron a N'm timan a rokon yan, satiman bo a mada ko tao sangkanan a N;m timan a rokon na di skaniyan khab'thowan sa tao a Mapaparatiyaya, maana : ikhakapir yan.


PAGANAY A ROKON:

1. SO PARATIYAYA KO ALLAH:- maana: pharaiyayaan ka a ad'n a Allah a miyangadn a isaisa a skaniyan bo I da-it a p'sho-aso-atn.

Na aya kakhataratanto o Paratiyaya ko Allah na makanggolalan sii sangkai a t'lo Timan:

1. AT-TAWHEED A-OLOHIYYAH : so Kapaka isaisa a ko Allah sii ko kababaloy niyan a skaniyan bo I Dait a p'sho-aso-atn, dadn a salakaw ron, so langon a Simba na skaniyan bo a Allah I kapapatotanon, na so kasimbaa ko salakaw ron na Pakakapir na go Kapanakoto.

2. AT-TAWHEED AL-ROBOBIYYAH : so kapaka isaisa a ko Allah sii ko kababaloy niyan a skaniyan I kadnan o langon a kaad'n, skaniyn a di-inggiragiray ko langon taman, so langon a kappa-ar na rkaniyan a Allah, skaninyan I dii mamgay sa Rizki, so langon taman sangkai a Alam na sii sa kapaar o Allah, daa sakotowa iyanon, na so kathindga o Manosiya sa and a p'd o Allah a a dii nggiragiray sangkai a Doniya lagid o mga Shi'ah a p'd kon a mapapa-ar ko Doniya na so pito katao ko mga Sahabah "ra" na Paka kakafir, sa tao a aya tindg yan na and a p'd o Allah, odi na ad'n a salakaw ko Allah a dii nggiragiray sangka-I a Doniyan na Kafir.

3. AT-TAWHEED FIL –ASMA-I WASSIFAAT : so kapaka isaisa a ko Allah sii ko mga Ngaran yan na go mga Sifat yan, Maana: so langon a ngaran o Allah na go langon a Sifat yan na sii rkaniyan bo patot, daaba niyanon lagid, go daa ba niyanon rimbang.
So kataratantowa tano ko Allah ko mga ngaran na go mga Sifat a pitharo iyan na go pitharo o Nabi "saw" a gyoto na Ngaran o Allah na go Sifat o Allah, d apharatiyaya-an tano a gyoto na Ngaran o Allah, odi na Sifat o Allah, sa ditano iphangibarat, na go ditano iphanolagid na go ditano phamagalin'n so maana niyan, go di tano ip'ropa sabap sa ditano anan katawan ka da tharo o Allah I ropa-an yan, na ditano iphanolagid na go di tano iphangibarat, kagiya pitharo iyan sa Qur-an [ DAA BA NIYAN LAGID KO MGA SHAYI, GO SKANIYAN NA PHAKAN'G NA GO PHAKA ILAY ]
Na sii sangkanan a Ayat na pitharo iyan a and a Sifat yan a ka ilay na go kapakan'g. oga-I na knaba lagid o kailay o mga Tao, knaba lagid oa Kailay o mga kaad'n yan, knaba lagid o kap'phakan'g o mga ka-ad'n yan, ka miyawna so kiyatharo-a niyanon sa [ DAA BA NIYAN LAGID A SHAYI ]


Bali aya maana o lalag na pharatiyayaan tano na go tharatanton tano ko Allah so langon a Ngaran na go langon a Sifat a pitharo iyan a go pitharo o Nabi "saw" a gyoto na Ngaran na go Sifat o Allah sa aya paratiyaya tano ron na sii ko okit a kadada-it yan sii ko Allah na go so okit na go ropa-an a kabaya iyan, sa ditano iphangibarat, na go ditano iphanolagid, na go ditano phamagalin'n so maana niyan, na go ditano ip'ropa.
[ Gyanan I Panarima o Ahlussunnah Wal jama'ah, na sa tao a maka silay san so tindg yan namiyapokas ko Agama a mini talingoma o Nabi "saw" ]


OSAYAN SII KO PARATIYAYA TANO SII SANGKANAN A MGA NGARAN NA GO MGA SIFAT O ALLAH:
1. So Ngaran na go Sifat a miya Aloy o Allah na go miya aloy o Nabi "saw" a gyoto na Ngaran odi na Sifat o Allah na Pharatiyaya-an tano na go tharatanton tano ko Allah, sa lagid a kiya osaya tano ron anan sa Una-an.
2. So Ngaran na go Sifat a miya Aloy o Allah na go miya aloy o Nabi "saw" a gyoto na k'naba Ngaran na go k'naba Sifat o Allah na phakada-an tano oto ko Allah, na sa tao a tharo-on yan a gyoto na Ngaran odi na Sifat o Allah na Kafir, lagid o [ kapakaturog ] pitharo o Allah sa Ayatol Korsie a skaniyan a Allah na di phakaturog, na sa tao a tharo-on yan a so Allah na dii makaturog na sabnar d'n a mimbaloy a KAFIR.
3. So da ma aloy o Allah, go da ma aloy o Nabi "saw" oba Ngaran odi na Sifat o Allah na ditano oto ph'labot'n, ka di tano katawan, sabap sa dawto matharo o Allah na go da matharo o Nabi "saw".


NOTE:
So mga Sifat o Allah na go so mga Ngaran yan na tanto a madak'l, khapakay a dingka katawan na si Sifat na Sifat o Allah na pitharooka a knaba niyan Sifat na miya ribat ka, bali kailangan d'n mga Pagari akn so ka isha ko mata-o ron, pitharo o Allah sa Qur-an [ isha kano ko mga tao a miyamaganad ko Qur-an amay ka skano na di niyo katawan ]

Ino tano aya dii pamagosaya ka mindakl imanto so mga Tao a p'phamakada-aniran so mga Sifat o Allah, go p'phamagalin'n iran so maana niyan, na p'khada ko Allah so Sifat a pitharo iyan a Sifat yan, na gyoto na tanto oto a dilikado ka sod'n so Katharo o Allahu Subhanahu wat'ala na aya niyan pishol'dan, obadi marayag so mga Dalil tano sa so Nabi "saw" na go so mga Sahaba "ra" na knaba iran piyamagalin, ka aya tindg iranon na sod'n so kib'b'tad yan na go kidadaptar yank o Qur-an a go Hadith na gyoto d'n s'kaniyan sad a iran pangibarat'n na go dayran panolagid'n na go da iran ropa-an na go dayran pamakada-a, sabap sa katawaniran a so bo so Allah I l'bi a matao ron.


Phangnin ko ko Allah a mabaloy tano a mga tao titho a mpaparatiyaya ko Allah na go so Nabi "saw", mabaloy tano a mga tao a aya Agama iran na so titho a Agama a mini talingoma o Nabi "saw", aya mabaloy a tindg tano ko Agama na [ PITHARO O ALLAH NA GO PITHARO O RASULOLLAH ] di mabaloy so tindg tano a [ PITHARO I GIRAW NA INOBO SI GIRAW ]

Kowa-an tano sa ginawa tano so kibr na goso di katharima sa bnar, l'kaan tano so mga Pyso tano ko mga katharo o Allah na go so mga Katharo o Nabi "saw" ka antano thagompiya sa Doniyan na sampay sa Alongan a Mawri.

Wassalamo 'Alaikom w.w.

TOTHOLAN KO DAJJAL, BY: ATAH P. IBRAHIM

TOTHOLAN KO DAJJAL, BY: ATAH P. IBRAHIM


Pitharo o Nabi "saw" :
 
Hay so skano a mga tao, mataan a dadn a Fitna "Tiyoba" a miya ad'n sangkai a liyawaw o Lupa, ipoon ko kiya ad'na o Allah ko mbawataan o Adam a bam aka lawan ko kaphakawma o Dajjal.

Go mataan a so Allah na dadn a ba niyan miyasugo a Nabi inonta na paki iktiyaraniya ko Omat yan so Dajjal.

Na sakn I moripori a Nabi na skano I moripori a omat.

Na mataan a sii rkano d'n phaka g'maw so Dajjal.

Na opama ka makawma a sakn na bibiyag ao p'n na sak'n imatao ron, "sakn i maki shinogata-on", na o makawma a sakn na miyawafat ako dn na omani isa na kata-o niyan d'n a ginawa niyan, na so Allah i sharigan akn ko mga Muslim.

Go mataan a sii s'kaniyan phakambowat sa pagltan a Sham "Soriya/Seria" a go gya Iraq, na phag'n'b-n'b d'n sa Diwang Kawanan.

Mga Orip'n o Allah na Phapar'r'n'k kano ka ip'ropa akn rkano so Dajjal sa ropa-an a dad'n miropa o miyanga oona-an akn a Nabi.

Amay ka makawma na phanagipo-on d'n sa ptharo-on yan a [ mata-an a sak'n na Nabi ] na di niyo pharatiyaya-a ka dadn a phakatondog rak'n a Nabi.

Iriyan yan na ithondog yanon a [ sakn so Kadnan yo ] na di niyo pharatiyaya-a ka so Kadnan tano na di tano khaylay odi tano mamatay.

Go mataan a skaniyan a Dajjal na sabala e Mata, na so Kadnan tano a knaba Sabala e Mata, "I say: p'd inin sa mga Dalil a so Allah na ad'n a Mata niyan, pitharo o Nabi "saw" [ so kadnan tano na knaba sabala e Mata ]"

Go mataan a skaniyan a Dajjal na misosorat ko pagltan a Mata niyan a [ KAFIR ] "Arabic a kisosorat yan"

Langon a Mu-min na khabatiya iyanoto, matao shorat atawaka di matao shorat n akhabatiya iyanoto "thawfikan o Allah"

Na p'd a Fitna niyan na maawid s'kaniyan sa Sorga a go Naraka, na so Sorga iyan na aya Naraka, na so Naraka iyan na aya Sorga.

Na sa tao a itiyoba-on so Naraka o Dajjal na pamangni sa Tabang ko Allah na go batiya-a niyan so Soratol Kahf.

Ka khabaloy ron so Naraka a mat'nggaw na go kalilintad sa lagid o miya sowa o Nabi tano a Ibrahim "as"

Go p'd pn sa Fitna niyan na p'tharoon yanko tao a [ aydapat ka o oyaga ko rka si Ama aka a go si Ina aka, pharatiyaya ka a sakn so Tohan ka? Na ptharoon o Tao a Oway, na phakag'maw so dowa a Shaitan a mbobontaln iran so Bontal e Ama iyan a gosi si Ina iyan, na ptharooniran a dowa : hay ikaritanko na skaniyan so Allah na onot kawn ]

Go p'd a Fitna niyan na khowa sa Sakatao a tao na mbono-oniyan, nggabas'n yan a angkawto a orip'n o Allah, na magabas yan na ptharo-oniyan, ilaya niyo a Orip'n akn inin ka oyag'n akn, na mawyag na tigiyan a Anta-a e tohan ka? Na p'tharoon yan a So Allah, na ska na rido-ay ka o Allah.

Go p'd sa Fitna niyan na phaka oran'n yan so Langit na pagoran, na go shogo-on yan so Lupa na p'lonaw ron so pithibarangan a Pamomolan.

Go p'd sa tiyoba iyan na Somagad ko ingd na gopho-oniran pakambokhaga ka diiran paratiyaya-an na dad'n a malamba a kawyaganiran inonta na mabinasa.
Go p'd sa Fitna niyan na Somagad ko ingd na o paratiyaya-aniran na pakakhapiya-aniyan so langon a kawyaganiran.

Go dad'n a satiman bo a ingd sa intiro a Doniya inonta na khasoldaniyan na go khipaar yan inonta bon a giya Makkah a go giya Madinah, ka omanon khabaya somol'd na alawn o mga Mala-ikat a khip'p'dang a manga gagarang, taman sa tharg skaniyan ko Darpa sa obay a Madinah "sii kon sa Jorf a darpa anan sa obay a King Fahd Hospital imanto" na p'linog'n a Madinah sa makatlo, na pliyo rkaniyan so langon a Monafiq a kapapantagan sa Madinah.

Na so langon a marata na khada sa Madinah sa lagid o kap'khakowai sa tangis o Apoy ko Potaw.

Na gyangkoto a gawi-i so gawii a kapakap'sh'nggaya.

[ Na pitharo e Ummo Shareek "ra" : ya Rasulallah anda matatago so mga Arab sa angkawto a Masa? Na tigo Nabi "saw" : mayto siran e bilangan sii sa angkawto a Masa, so kadaklan kiran na sii sa Baytol Maqdis "sa Filasteen" na aya Datu iran roo na so Mama a Mapiya e kaphagagama, na amay ka mawma so Fajr na phagimam a angkawto a Datu iran, na phaka Oma so 'Esa "as" a maka popo-on sa Langit, na phakawri so Datu ka aya niyan paka phagimam'm so 'Esa "as" na khaptan o 'Esa "as" so Datu na tigiyan a s'ka d'n e Pagimam ska I kiyakamatanon, ( NOTE: sii ko kaphaka oma o Nabi "Esa "as" na k'na d'n oba s'kaniyan Nabi ka ph'mbaloy skaniyan a isa ko mga Omat o Nabi tano a Muhammad "saw" ) na maka shambayang siran na nggiraw so 'Esa "as" a l'kai niyo a paytaw anan, na l'kaaniran na ayayran d'n khal'kaan so Dajjal ko liyo o Paytaw, a ad'n a mga p'd yan a 70,000 a kadak'l yan a Yahodie a palaya d'n khip'p'dang ( NOTE: sii sangkanan a Masan a so langon a mini bago imanto a miya descover o Technology na khada, lagid o mga Timbak, mga Plane na khada anan langon amay ka magaan dn so bangkit, khasoy tano sa paka-asal , gyanan e sabap a gyangkanan a mga Yahodee a sondaro o Dajjal na aya awid iran na mga p'dang. Knaba mga M16 and etc… na andad'n e kailaya o Dajjal ko 'Esa "as" na khatno sa lagid o kap'kha t'no o Timos ko ig, na malagoy dn, na phang't'd'n o 'Esa "as" na khara-ot yan sii sa s'bangan a [ LODD ] na mbono-on yan ].

Na pholampolang'n o mga Muslim so mga Yahodi, taman sa igira a mithapok so Yahodee na so thatapokan yan mlagid o kayo, wator o antonaa p,n nap aka p'tharo-on o Allah na thawag'n yan so Muslim a tigyan a Hay Orip'n o Allah a Muslim na kataya so Pimorkaan o Allah a Yahodee a thatapok rakn na Bono-angka.

Na ph'ndato so 'Esa "as" sangkai a Doniya sa iph'ndatu iyan so Agama o Nabi tano a Muhammad "saw" mawntol a Datu, phamropt'n yan so mga Cross, na go phamono-on yan so mga Baboy, go phakada-an yan so Bowis, ( imanto na aya kokoman tano sii ko Jihad na before tano phamono-on so mga Kafir na ph'da'wa-an tano siran a da-an na o di siran phag Islam na phaka b'gan siran sa Bowis, na odi siran mb'gay na phamono-on siran ) na makawma so 'Esa "as" na ngg'n'kan yan so Bowis, so mga Kafir na odi pagislam na patay.

Giya Hadith anan na piyanothol e Ibn Majah, ad'n a kalobay o Hadith oga-id na madak'l a Sahih "mabagr" a Hadith a maka bababid sa Hadith anan.

Pangnintano ko Allah a maka ligtas tano ko Fitnah o Dajjal a Kiyamorkaan o Allah… p'd a miya aloy sa Hadith na aya mga Sondaro o mga Dajjal na so mga Shi'ah a go so mga Yahodee.


Wassalamo 'Alaikom w.w.

Monday, December 26, 2011

SO KABNAR O OMAN I ISA KO KAROMA NIYAN


SO MANGA KABNAR O BAI KO KAROMA NIYAN A MAMA

BY: Hasanur Alapa 


1. SO BTANG (Mahr):

So btang na skaniyan so tamok a patoray ko mama so kibgan iyan on ko babay sabap ko kiapangaromaa niyan on. Go rk o Mahr so ingaran a madakl sii ko Islām sa pmbthowan sa Sadāq, Nihlah, Ajr, Farīdhah, Uqr, karina nan sa kipapatoray niyan ko kakharomai a so katimbl o maana niyan na makanggogonanao sa pammgayan a patoray a sakasakaw ko babay sa kna o ba niyan arga ko kaphangaromaa on.

Khawajib so btang sabap ko kanggolalan o kapasadan a kakharomai a mapiya (aqd) sa magtas so kapasadan ko kiakharo-mai sa misabap ko idin o walī  ko babay ago so katarima o mama a miangaroma, odi na so kasoldi o mama ko karoma niyan (amay ka da a miabathk a Mahr ko onaan iyan). Sa anda i katarotop o kapasadan ko kiakharomai na miawajib so Mahr san ko mama apiya da niyan kalawasi so karoma niya, sa o mawafat so isa kiran a dowa na miatankd a so Mahr na kabnar o babay odi na so manga waris on.

Amay pman ka so kiakharomai na binasa ka datar o kakharomai a da a saksi a dowa kataw na di khawajib so Mahr sii ko mama, inonta bo o ba niyan kalawasi so babay a piangaroma niyan ka khawajib so Mahr. Opama o mawafat so isa ko kharomai sii ko kiakharomai a binasa (fāsid) sa da kalawasi o mama so babay na da a patoray ko mama a btang.



SO KARINA SA KAWAWAJIB O BTANG:

Pitharo o Allāh I  a: [Go bgan iyo ko manga babay so mahar iran a pammgayan]Go miapanothol a miakapoon ko Rasūl r a: Sa mama a isayat iyan so rnding o piangaroma niyan na go niyan ilaya na miawajib on so btang kialawasan iyan antaa ka da.


SO HIKMAH KO KINISOGOON KO BTANG:

Inipaliogat o Allāh so btang sa inipayag ko kala o kakharomai, ago slasla ko babay, sabap sa o piakay so kakharomai sa da a btang na miakarondan so babay ago phakadapanas, sa di pagargaan o mama so karoma niyan sa pagilayin iyan sa kailay a kapagitoito, na di phamondas so kapipiya ginawa ko lt iran a dowa kataw, sa di khatatap so kandayo ago so kakhalimoay.

Sa inipatoray o Islām ko mama ka an magdam o babay a mataan a skaniyan na sslaan o mama ago pkhababayaan iyan ago sisiyapn iyan, sa thanggongn iyan, so manga patoray ko kaoyagoyag sa kapakatindga iran ko torogan o kathiwalaya, sa khabaloy a dkhai o mokarna iran a dowa kataw.


SO SOSONAN O BTANG:

So btang na dowa soson:

> Btang a miatndo (miaaloy) (mahr musammā) skaniyan so btang a piagayonan ko kiakharomai, odi na tiankd ko oriyan o kiagtas o kapasadan ko kiakharomai sa piagayonan.

> Btang a pilagidan (mahr mithl): skaniyan so btang o babay a sii dinianka ko dianka a minibtang ko manga lolot iyan a babay ko kasabala iyan ko ama iyan, ka datar o minibtang ko pagari niyan go so babo iyan ki ama iyan a phakalagid on sa pankatan, ko kataid kabilangataw, kapagagama ago so katao.

Amay ka da a khatoon ko manga tonganay niyan ki Ama iyan a phakalagid on na so saginda niyan a babay ko pamiliya a datar o pamiliya i ama iyan.


SO KHAPAKAY A IBTANG:

Khapakay a btang so langowan a tamok a adn a arga iyan a katotokawan a khaarga, mlagid o pirak antaa ka tamok a barandiya a salakaw, antaa ka gona a khapakay a argaan sa pirak.

SO DIYANGKA O BTANG:

Miaopakat so manga Ulama ko Islām sa mataan a so btang na da a diangka o kala iyan, sabap sa da a khatoon a paraman ago sabdan a ba niyan tiamani.

Go da saparn o Islām so kabtangi ko babay sa mala a tamok, ogaid na aya kaphakarata iyan na oba mabaloy so mala a tamok a makabalamban ko phangaroma ko di niyan on kakhagaga sa kasabapan sa kapitas iyan, ka sa manan na pmbaloy so mahar a datar o ba arga o babay a phangaromaan, na da a nan pakapiaa o Islām, sa aya dn a inipangoyat o Islām a babarakatn a kakharomai na so miokit sa malbod. Kiabayaan o Umar Bin al Khattāb a tagoan iyan sa dianka so mahar o manga babay ko kala iyan, sa pitharo iyan a di sobraan so mahar ko pat gatos a Dirham, na adn a somialawada on a sakataw a babay sa pitharo iyan a: Da’ a kabnar ka san hay Umar, andamanaya i kaptharo anka san a so Allāh I  na pitharo iyan a: Go amay ka migay kano sa isa kiran (a manga karoma) sa madakl a tamok (a btang) na di kano ron khowa sa mlk bo’. Na mitharo o Umar a: Bnar so babay na ribat so Umar. Pitharo o Rasūl r a: Mataan a pd sa kabarakat o babay so kalbod o kapangakapi ron ago so kalbod o kabtangi ron.

So pman so dianka o kaito o btang na kiasobagan ko manga Ulama, so Abū Hanīfah na aya pitharo iyan na: Aya kaito o btang na sapolo a Dirham a pd sa pirak, go so phakatimbang on ko manga pd a pirak. Aya dalil iyan na so katharo o Rasūl r a pianothol i Jābir a: Da a btang a minos ko sapolo a Dirham.

So Imām Mālik na pitharo iyan a: Aya kaminos o btang na tnga a Dīnār, amay ka diankaan ko bolawan, na tlo lad a Dirham amay ka diankaan ko pirak, odi na so phakaarga on, sa sii niyan initaks ko dianka o tamok a o pamankhawa na khipotol sa lima o miamankhaw a skaniyan so tnga a Dīnār a bolawan.

So As Shāfiī ago so Ahmad na da iran tamani so kaito o btang sa langowa khapakay a maarga na khapakay a ibtang sabap ko manga hadīth o Rasūl r a pitharo iyan a: Sa taw a mgay sa btang sa isa a babay sa dianka a saakop a korma na sabnar a miahalal. (pianothol i Abū Dāūd a phoon ki Jābir). Pianothol o Amir Bin Rabī’ah a adn a sakataw a babay ko mbawataan o Fuzārah a miakibtang sa dowa a bakiya, sa pitharoon o Rasūl r a: Inikasoat ka sa ginawa nka so dowa a bakiya? Na pitharo iyan a Oway, na piakay o Rasūl r.

So btang na khapakay a matonay ko masa a kapkharomai, na khapakay pman a mataalik, langon antaa ka so sabagi on, odi na sii ko dowa a masa; sii ko kamblag odi na sii kawafat, odi na sii ko taalik a phagayonan o dowa makambabala, khapakay pn a makaokit sa mainsowal a kazaginton sii ko masa a mattndo.


2. SO PAGPR O BABAY:

So pagpr na skaniyan so pkhaosar o manosiya sii ko karoma niyan ago so manga wata iyan go so manga tonganay niyan ago so kamimilikan iyan, a pd sa pangn’nkn ago nditarn ago so darpa a babalingan.

So pagpr o babay na skaniyan so pangn’nkn iyan so nditarn iyan ago so darpa a babalingan iyan, ago so salakaw ron, a di niyan mipndaraynon ko kapphagintaw niyan ko dianka a kalalayaman ko manga taw.

So Karina sa Kipapatorayin on ko Mama:

Sabnar a miatankd so kipapatorayin on ko mama sa minggolalan ko Qur’ān ago so Hadīth ago so kiaopakati ron ko manga Ulama: Pitharo o Allāh I a: So mimbawata na maphakasoso niyan so manga wata iran ko dowa ka thmg a tarotop, sii ki taw a khabayaan iyan  tomarotop so kapakasoso, na patoray ko (ama) so pagpr iran (a wata ago ina) ago so nditarn iran sa nggolalan sa mapiya (al Baqarah 233).

Pitharo o Rasūl r a:  Kalkn iyo so Allāh sii ko manga babay ka mataan a skano na kinowa niyo siran a sarig o Allāh ago piamakay niyo so manga awrat iran sa kabaya o Allāh, na rk iran a patoray rkano so pagpr iran ago so nditarn iran sa nggolalan sa mapiya.

Go pianothol o al Bukhārī a so Hind Bint Utbah na pitharo iyan a hay Rasūl r: Mataan a so Abū Sufyān na mama a maikot a di ako niyan mbgan sa gasto a phakaampl rakn ago so wata akn, inonta bo so pkhowaan akn ko tamok iyan sa di niyan katawan. Na pitharo o Rasūr a: Kowa ka ko tamok i Abū Sufyān sa phakaampl rka ago so wata aka sa nggolalan sa mapiya.

Go miatankd ko kiaopakat o manga Muslim sa kiawajib o pagpr o babay san ko karoma niyan a mama iphoon ko masa o Rasūl r na taman imanto.

So Sabap a Kiawajib o Pagpr:

Miawajib so kapagpra o mama ko karoma niyan a babay sa balas o katataronko iyan a babay ago so gii niyan on kanggonai sa pkhasawitan iyan sa ingaran a kaproyoda, ago so salakaw ron a khoyaptaan iran, ago so kasasakodowi ron o karoma niyan. Sa anda dn i kapangaromaa o mama ko babay na miahalal on sa miaharam skaniyan a babay ko manga pd a mama a salakaw ki karoma niyan, sabap sa siyap ko bangnsa o moriataw niyan, sa so babay na khitindg iyan so antap o kaoyagoyag a kandarodopa ago so kapzinanada ko manga wata iran ago so kaiipira niyan ko sold o walay niyan, sa aya mambo a sambi anan na so kabastantia o mama ko pagpr iyan ago so manga pd a pangindaw niyan.

So Manga Sarat a Kiawajib Iyan:

Amay ka aya kipapatoray o pagpr na sabap ko katataronko o babay ko walay o karoma niyan, na inisarat ko kakhawajib o pagpr so phakatalingoma:

> Mabaloy so kiakharomai a minggolalan ko kitab sa mapiya.

> Mabaloy so karoma a babay a khakowa on o mama so kabaya iyan ko kaproyoda.

> Da a makasapar ko mama ko kakhowaa niyan ko kabnar iyan a phakasapar a da sa kitab, odi na manga sabap a miaadn sa da a ba niyan on galbk.

So Manga Babay a Da a Ba iran Kabnar ko Pagpr:

> So manga babay a piangaroma sa minggolalan sa kakharomai a binasa, go so babay a kialawasan o mama sa minggolalan sa minilingo, na da a kabnar o mama sa ba niyan mataronko so babay ko datar anan a btad sa patoray kiran so kamblag, sa da a khaskat o babay a pagpr.

> So karoma a maito i idad a di khapakay o ba kalawasi o karoma niyan sabap ko kaito iyan. So pman so karoma a babay a pkhasakit sa di niyan khagaga o ba niyan mibgay ko karoma niyan so kabaya iyan ko kaproyoda mlagid o aya kiasakit iyan na sii ko oriyan o kiapangaromaa on antaa ka sii ko onaan iyan, na go da niyan sankaa so katogalin ko walay o karoma niyan a mama na so gasto na patoray ko mama.

> So karoma a makakalaboso ko kiapakanggolawla sa kasalaan odi na bayadan, apiya pn aya kiakalaboso niyan na kiaslimbotan na da a kabnar iyan ko gasto, sabap ko kiada o katataronko iyan ko walay o mama a karoma niyan sa di niyan kapnggonaan.

> So karoma a giasab o isa a mama, maana a inipalagoy niyan, na daa kabnar iyan a pagpr ko tday a katatago iyan ko domiakp on, sabap ko kiada iyan sa taronko o karoma niyan.

> So karomaa a milayalayag sa mawatan a di kabaya i karoma niyan, amay pman ka kabaya iyan na patoray ron so pagpr.

> So karoma a giinggalbk sa liyo a walay o karoma niyan na go niyan siapari na da niyan  targn so galbk iyan na da a kabnar iyan a gasto, sabap sa miada so katataronko iyan sa walay i karoma niyan, amay pman ka da niyan sapari ko kaphliyo niyan na patoray ron so pgpr.

> So karoma a di niyan tatanoran so karoma niyan a mama, sa da a kabnar iyan ko pagpr sa nggolalan ko kitab, sa taman sa di tomogalin ko walay o mama sa itaplk iyan so karikor.


So Dianka o Pagpr:

So mama i makakhakapaar ko giikapagpra ko babay ko domadait on a pd sa pangn’nkn ago nditarn, ago so salakaw ron. Sa patot a masiyap ko kandiankaa ko pagpr so phakatalingoma:

> So btad o karoma a mama ko kaloloagi ron ago so karrgni ron, sa amay ka kaloloagan na makaphagpr sa maloag, amay pman ka karrgnan na makapnggasto ko taman a khagaga niyan, apiya pn kawasa so babay, amay ka lmbak i maoolawla, na makapnggasto sa lmbak. Pitharo o Allāh I  a: [Nggasto so adn a kaloloagi ron ko khagaga niyan so pman so madidianka so pagpr iyan na nggasto ko inibgay ron o Allāh, da a pialiogatan o Allāh a ginawa inota so khagaga niyan ].

> So giikapagalinalin o arga sii sa padian ko kaphagozor o arga ago so kapkhibaba iyan ago so kapkhaalinalin o btad o karoma a mama ko tamok ko kandiankaa ko pagpr.


3. SO KAPAGINONTOLAN O MAMA KO MANGA KAROMA NIYAN:

O pangaroma so mama sa kasobraan so isa na paliogat on so kapaginontolan iyan ko ltlt iran a manga karoma niyan, sii ko pagpr ago so kanditar ago so dranga a babalingan, o pakalbiya niyan so isa kiran ko shayi a makasosold ko gaga niyan na miadosa skaniyan.

Inipaliogat so kapaginontolan ko ltlt o manga karoma sabap ko katharo o Allāh I a: [Pangaromaa niyo so miasoat kano ron a pd ko manga babay, dowa, odi na tlo, odi na pat, na amay ka ikawan iyo a di kano makaphaginontolan na isaisa. (an Nisā’ 3).]

Sabnar a inisogo o Allāh I so kathankaa ko kapangaroma sa isa igira inikawan o mama so di kapakapaginontolan ko kandoway, sabap san na khasabot sankanan a āyat so kiawajib o kapaginon-tolan sii ko kandoway.

Pitharo o Rasūl r: Sa mama a dowa i karoma na zoramig ko isa on na makaoma ko alongan a Qiyāmah a makasasailang (makikiling a kilid iyan) sabap ko kiazoramig iyan.

Patoray ko mama so kapakaplagilagida niyan ko manga alongan kiran, sa di niyan siran pakapmbidabidaan, sa da tamani o agama so masa a gii niyan kapagalongan ko manga karoma niyan sa sii matitimo ko mama ko dianka a khagaga niyan, khapakay a kazalongana odi na kandowa gawii, aya taralbi na di kalawanan so kapitho gawii, ka pangali sa oba maringasa so manga karoma.

Kapaar o babay so kibgan iyan ko alongan iyan san ko isa ko manga dowaya iyan, sabap sa rk iyan anan a kabnar. Miapanothol a so bai a Sawdah Bint Zam’ah a karoma o Rasūlullāh r na inibgay niyan so alongan iyan ko bai a A’ishah, sa khapakay pman a makipagalongan ko karoma niyan ko oras a kabayai niyan on.

Amay ka phlayalayag so mama na rk iyan so kapakambayabayaa niyan kiran o antai khabaya monot, ogaid na aya sunat na so kapakapripaa niyan kiran ka gianan i adat o Rasūl r ko manga karoma niyan igira mlalakaw na sa makakowa ko ripa na aya makaonot.

So kapaginontolan o mama ko lt o manga karoma niyan na kabnar anan o manga karoma, sa odi paginontolan so mama na kabnar o babay a kaphanon iyan ko kokoman, na so kokoman na patoray ron so karasnga niyan ko mama sa makapaginontolan sa odi paginontolan na khataazir (khasiksa).

Mataan a miawajib so kapaginontolan ko lt o manga karoma sii ko rinayagan a khagaga o mama lagid o pagpr kanditar kapagalongan, so pman so misosoln ko poso na da anan sa gaga o manosiya. So Rasūl r na giimaginontolan ko manga karoma niyan sa gii niyan tharoon a: Hay Kadnan ko giyai so giiakn kambagibagi, sii ko mipapaar akn, na di ako nka phanginsoyai ko mipapaar ka a di akn mipapaar.

Giankai a kabaya a phoon ko poso’ na di khagaga o manosiya so kapakandatadatar iyan ko manga karoma, pitharo o Allāh I  a: Di niyo dn khagaga o ba kano makapaginontolan (sa tarotop) ko lt o manga babay, apiya pn i kasiyapa niyo ron, na di kano pzoramig sa tarotop a kazoramig, sa mibagak iyo (skaniyan a karoma a babay) a datar o maaalangalang.

Piakay o Islām so kibagakn ko shayi a di khagaga o manosiya, da a inipaliogat o Allāh I  a rowar ko khagaga o manosiya.

Miapanothol a so dato tano a Umar Bin al Khattāb na giimbagi-bagi ko lt o manga karoma niyan sa gii niyan tharoon a: Kadnan ko so poso’ akn na di akn mipapaar, na so salakaw ron na pagarapn ko a makapaginontolan ako ron.


4. SO DI KARINGASAA O MAMA KO KAROMA NIYAN:

Pd sa kabnar o babay ko karoma niyan a mama so di niyan on karingasaa sa nggolalan sa katharo odi na galbk, odi na paparangayan, ka so karingasaa on na inisapar o Islām, sabap sa pitharo o Allāh I a:Tangana niyo siran (so manga babay) sa mapiya, odi na talaka niyo siran sa mapiya, di niyo siran tatangana sa ringasa ka makapamaba kano, sa taw a nggolawla san na sabnar a lialim iyan a ginawa niyan.

So kapiya a kindolonaan ko karoma a babay na tanda sa kabilantadi o mama ago so kabilangataw niyan, na so karingasaa on na toos ago papata ko karata o mama ago so kamomondo niyan i sowasowai, pitharo o Rasūl r a: Da a somiakaw kiran a manga babay a rowar sa bilangataw a mama, go da a miakadapanas kiran a rowar sa mama a maligt a mondo.

Pitharo iyan pn a: Di nka phran’ga so babay sa paras, go di nka phamaawinga, go di nka pagawai inonta bo sii sa walay (maana a awaan ka ko igaan iyan ogaid na di ka lomiyo sa walay).

Amay ka lomiyo so mama ko inibgay o Islām a tamana, ago ringasaan iyan so karoma niyan sa katharo odi na galbk, na kabnar o babay so kaphanon iyan ko kokoman, ka an iyan marasng ankanan a mama ago an iyan masiksa amay ka miapatot on, sa da a kabnar o babay ko kapangniya niyan ko kamblag sii ko kpit oAbū Hanīfah.

So pman so Imām Mālik na aya kpit iyan na kabnar o babay so kapangniya niyan ko kamblag sabap ko ringasa o mama, sa khadianka o kokoman ankanan a btad, amay ka kiabinasaan so babay sa patot a kandaan o mama na tgln skaniyan o kokoman, sa makowa o babay so kabnar iyan sa tarotop.






SO MANGA KABNAR O MAMA KO BABAY


1. SO KAPANGONGONOTAN:

Paliogat ko karoma a babay so kaonoti niyan ko karoma niyan a mama ko langowan a nganin a da saparn o agama Islām, kagiya daa onot ko inadn ko kakhasopaka ko sogoan o Miangadn.

Iniitong o Islām a so kaonoti o babay ko karoma niyan na lagid o kanjihad sa lalan ko Allāh I, aya karina san na so miapanothol a miakapoon ko Ibn Abbās a adn a sakataw a babay a miakaoma ko Rasūl r sa pitharo iyan a: Hay Rasūlullāh sogo ako o manga babay sii rka sa giankai a jihād na patoray ko manga mama sa o nggolalann iran na balasan siran o Allāh, na o mangasasahid siran na maadn siran a oyagoyag sii ko Kadnan iran sa phrizqiyan siran, na skami a manga babay na sasakodowan ami siran na antonaa i rk ami sankanan? Na pitharo o Rasūl a: Sampayin ka ko manga babay a so kaonoti ko karoma a mama sa paratiaya ko kabnar iyan na khatimbang iyan so jihād, sa kainotan rkano a manga babay i pnggolawla on.

Sii sankanan na pitharo o Imām Alī a siakaw o Allāh I so paras iyan a:Aya kaphrang o babay na so kapiya niyan i kandadarodopa.

Go pitharo o Rasūl r a: Sa dn sa babay a matay a masosoat on si karoma niyan ko kiapatay niyan na makasold ko Sorga.


2. SO KATHAKNA O BABAY KO WALAY O KAROMA NIYAN:

Igira piagiyasa o mama so walay o karoma niyan na patoray ko babay so kadrang iyan sankanan a walay, amay mambo ka makasasarig on sa da a ba on phakaringasa, sa di ron phakaliyo inonta bo o kabaya o karoma niyan a mama, odi na sii ko masa a di mipndaraynon ka datar o kambisitaa niyan ko loks iyan ago so salakaw ron.

Pd sa mapiya a di dn tamanan so masa a giikapamisita sa sii anan bagakn ko btad o dowa kataw ko kalalayami ron a adat ko pamiliya, sa mabaloy so kaphliyo o babay a makapagoonayan ko agama ago so kapipindiara.


3SO KATANKD O BANGNSA O MANGA WATA IRAN:

Pd sa kabnar o mama ko karoma niyan so katankd o bangnsa o manga wata iran sii rkaniyan, siran oto so manga wata a inimbawata siran o karoma niyan ko masa a kiapakakharomai.


4. SO KIKHAPAARN O MAMA KO KAPAKAMBILA-NGATAWA ON:

Inipaliogat o Islām ko babay so kaonoti niyan ko karoma niyan sii ko nganin a da saparn o Allāh I, go inisapar iyan ko babay so kaonkir ago so kalikoi niyan ko mama, sa rk o mama so kabnar ko kapakambilangatwa on sii sankanan na pitharo o Allāh I a: So manga mama i mamamayandg ko manga babay, sabap ko inilbi o Allāh ko sabaad kiran ko sabagi, ago sabap ko mianggasto iran a pd ko manga tamok iran (an Nisa 34).

Go pitharo o Allāh I a: [ So siran oto a manga babay a ikhalk iyo so kaonkir iran na thomai niyo siran, ago awai niyo siran ko igaan, go dan’ga niyo siran  (sa kadan’g a di makamorala) amay ka onotan kano iran na di niyo siran phlobai sa okit, mataan a so Allāh na Maporo a lbi a Mala] (an Nisa 34).

Sii sankai a āyat na inibgay niyan ko mama so lalan a pagokitan iyan ko kapakambilangatawa ko karoma niyan a taonkir a di phangongonotan, giankanan a okit na mattlo pankat:

> So kathomai ko babay sa mapiya, maana a pangosiatan o karoma niyan sa manga pipiya a pando ago manga gonanao a manga rarayag, na amay ka di ron makaompiya, na togalin ko ika dowa a okit.

> So katawaranga niyan on sa igaan sa di ron makiprmbang, ka an magdam o babay so kiatawantawan ago so kaada o kandayo ago so kaproyoda, sa di makalawan ankanan a masa sa pat olan a tarotop a inibgay o manga Ulama a taman, na amay ka di anan makarasng ko babay na mampn ka tomogalin so mama ko ika tlo  pankat a bolong.

So kadan’ga niyan on sa lawas, sa bialoy anan o Qur’ān a kaposan a okit ko kapakapangongonotan o babay a taonkir sa karoma niyan, da anan pharowa o Islām o ba maosar inonta bo ko kathaman o langowan a okit a khaparo sa kapakapangongonotan o babay, sa aya ropaan anan na so katharo o Rasūl r ko isa ko manga karoma niyan a kiararangitan iyan a: O da bo so kalk akn ko kitas sa alongan a Qiyāmah na ipran’g akn rka ankai a panisig.

Sa paliogat a di mabaloy ankanan a kadan’g a ba makamorala ko babay, sabap sa pitharo o Rasūl r ko kiapangosiat iyan ko kaposan a kianayk iyan a: Pamagosiataan iyo so manga babay sa mapiya, ka mataan a siran na manga biyag iyo, sa da a kapaar iyo kiran a mlk bo, inonta bo o ba siran makanggolawla sa marata a mapayag, ka amay ka makanggolawla siran na awai niyo siran sa igaan, ago dan’ga niyo siran sa di mabasng a kadan’g, na amay ka onotan kano iran na di niyo siran phangilayi sa okit, tanodan a mataan a rk iyo ko manga karoma niyo so kabnar, ago rk iran a manga karoma a manga babay so kabnar rkano, aya kabnar iyo sii kiran, na di ran pakidapoan so darpa iyo ko taw a ipkhagowad iyo, na aya kabnar iran rkano na so kaphiapiai niyo kiran sii ko ka nditar iran ago so pagpr iran.

So manga bilantadi a manga mama na di ran dangn so manga karoma iran sabap ko katharo o Rasūl r a:Di ndan’ga o manga pipiya rkano so karoma niyan.

Amay ka osarn anan o mama sa da a kabnar iyan ko babay, na kabnar o babay a kaphanon iyan ko kokoman, ka an iyan masiksa ankanan a mama a salimbot.