NETWORKING & PYRAMID BUSINESS [ ANTONAA I KOKOMAN YAN? ]
Antonaai ptharoon a Networking a go Pyramid a business?
Madakl anan a pimbarangan yan, ogaid na makaph'lagilagid sa Bontal odi na Okit…
Ibarat yan:
Ibarat o ad'n a Kompaniya a dii mang'mbaal sa Bulong, na dii niyan
phasaan sa ( 20 php ) na aya inokitan yan sa kaphasa-a niyanon na
angkanan a miya aloy a okit a Business.
Aya showa-an yan na Shong ibarat ki Ahmad na p'tharoon yanon: Ad'n a
kompaniya ami a giraw manaya na pag member kawn, 10,000 ibarat a
membership yan, go pamasa ka rkami sa Bulong ka angka rkami maka membro
na paka ph'ndagang'n ami ska sa mga product ami na omani maphasangka na
ad'n a rk kawn a (3 php), go aya showaan ka na phangilay ka sa ma
convince ka a mga Tao a maka member sa sii rka maka okit, na sa kadakl
a ma convince ka na kala a makowangka a Laba, maka convince ka sa isa
na ayark kawn na (3 php) , na gyoto dni showaani Ahmad na kha convince
yan si Omar a go si Amin na gyoto dn mambo i showaan I Omar a go si
Amin, na kagiya miyaka convince ka sa Dowa katao na aya khakowangka na
( 3x2 = 6)… Na ba san bo tataman? Di… Maka convince pman si Omar ibarat
sa tlo katao na skaniyan na phakakowa mambo sa (3x3 = 9) Na gyanan a
(9) anan a miya kowa i Omar na khakowa mambo i Ahmad, maana: aya
khakowai Ahmad na (6+9 = 15) maana: So p'kha convince ka na maka
convince mambo na adn pn a rk ka roo!
Na ibarat o gya tlo oto katao a miya convince I Omar na oman I isa
kiran na maka convince sa tlo katao na omani isa kiran mambo na phaka
kowa sa tlo a Laba, maana: (3x3 = 9), na si Omar na phakakowa sa siyaw
timan ka siyaw katao a miya convince oto o miya convince yan a tlo
katao, bali aya khakowa niyan na (3x9 = 27) na gya angkawto a (27) a
miyakowa I Omar na khakowa mambo oto i Ahmad a skaniyan so miyawnawna
ma ngonvince, na oman'n kawn so andang a makokowa niyan na a 15! (27+15
= 42)!
Bali sadn sa miyawna mag member na mala I p'khalaba, na sa miya ori
na mayto a p'khalaba niyan na igira a da a miya convince yan nab adn
miyada so ini pag membership yan!
Na gyangkanan a business na madakl a iph'mbtho ron o mga Tao na sadn
sa ibtho iranon na mlagilagid bo anan, odi na makaph'lagilagid bo, sii
bo igira dii makambidabida sii ko Product iran, odi na sii okit a
diiran kapangonvince sa Tao.
Pd a mga kibibida o Networking odi na Pyramid:
(1). Igira a so Kompaniya na kandagang a rkaniyan a galbk na aya
sharat a kaphaka pag member ka kiran na phaka bgay ka sa pirak a
mattndo go Sharat a sii ka kiran dii maka pamamasa-an na go paka
ph'ndagang'n ka iran, aya lagid anan na so [ AVON, DXN, VMOBILE ]
(2). Igira pman na giyabo a kaphaka bgaya iran rka sa Kapital a
membership ka oto na p'phakalaba-an ka iran sa oman sawlan, aya lagid
anan na [ VGMC ]
(3) Igira pman na gyabo a kaphag member ka kiran, na da a labangka
sii ko oman sawlan, ogaid na sii kaphag member ka na mbgan ka iran sa
benefit, go lagid dn mambo oto a sadn sa kadakl a ma convince ka na
kala a benefit ka, aya lagid anan na [ TVI]
(4). Sadn sa kawnangka mag member na kala a pkha kowangka a benefit,
na sadn sa kiya oringka mag member na khapakay a ayangka kiyalogi… go
madakl pn a salakaw san…
SO KOKOMAN YAN SII SA ISLAM:
Ad'n a mga Tao a piyakay iran anan oga-id na aya bnar na mala anan a HARAM!
Piyaka Haram o kadandan o mga ala a Ulama sa doniya, so mga ala a
Grupo a mga Ulama ko pithibarangan a ingd na aya ini kokom iran san na
Haram!!!
Sa kataya so sabaad ko mga Grupo a mga Ulama sa Doniya a minifta sa giyangkanan a lagid anan na Haram:
1. Allujnah Alda-imah Lilbohooth Al-'ilmiyyah wal-Ifta, Saudi Arabiya
2. Mujamma' Al-fiqh Al-Islamee, Sudan
3. Lujnatol Fatwa bijama'ati Ansar Al-Sunnah Al-Muhammadiyyah, Egypt
4. Markazol Fatwa bisshabaka Al-Islamiyyah, Qatar
5. Darul Ifta, Halab
Go tanto a Madakl so mga Ulama a miyaka Ifta sa Haram anan, lagid i
Dr. Sami Al-Sowaylim, Dr. Salman Al-'Awdah, Al-Shaikh Muhammad
Al-Munajjid go so mga salakaw kiran.
MGA SABAP A KIYA HARAM YAN A GO MGA DALIL :
[1.] Mapapadalmon so Gharar, aya Gharar na giya angkawto a dingka
kapaka sisigurado sa angkawto a kiyaphasai odi na galbk a business,
dingka masisigurado o phakalaba ka odi! Na mapapadalm anan sa angkai a
Pyramid na go Networking.
Sabap sa so member na di niyan masisigurado o ino oto phakalaba ron
odi? Ino madakal a kha convince yan o di? Go ikadowa na gya angkanan a
Pyramid odi na Networking na ad'n dn a Masa a khada bo anan, na so
member na di niyan masisigurado o ino oto khisampay sa mapuro a level
na phakalaba sa Mala atawaa ka diron khisampay na daa khalaba niyanon?
Na aya mataan na aya kadaklan a member sa mga lagid anan na p'phanga
lologi, mayto a p'phakatamok san!
Na giyanan i matantowan o Gharar, na piyaka Haram anan o Nabi "saw" sii ko Hadith a miyapanothol i Muslim
أن النبي صلى الله عليه و سلم نهى عن بيع الغرر ... رواه مسلم
Maana: mataan a so Nabi "saw" na ini sapar yan so Gharar!
[2.] Mapapadalmon so Riba sii ko pimbarangan yan, sabap sa so Member
na phmbgay sa mayto a Pirak ka an maka kowa sa mala a Pirak, na aya
miyasowa iyan na Pirak to Pirak a mbida sa kala a p'kha ori pn so
sabala-n, na giyanan dn so Riba a ini sapar o Agama Islam, so Product a
dii pakiphasa o Kompaniya na matag bo oto idadalong sii ko diikapaka
shambi a angkawt a pirak ka knaba gyotoi Hadap o member ka aya titho a
Hadap yan na giya angkawto a pkhakowa a mga Benefits!!!
Na so kakan sa Riba na tanto anan a mala a kadosaan…
Pitharo o Allah sa Qur-an
الذين يأكلون الربا لا يقومون إلا كما يقوم الذي يتخبطه الشيطان من المس... سورة البقرة 275
Maana: [ so mga Tao a pkhan sa Riba na di phamaka tindg sa Alongan a
mawri inonta bo na lagid o kapphaka tindg o Tao a Sosolkan a Shaitan… ]
Pitharo iyan pn
يا أيها الذين آمنوا اتقوا الله و ذروا ما بقي من الربا إن كنتم
مؤمنين، فإن لم تفعلوا فأذنوا بحرب من الله و رسوله... سورة البقرة 278-279
Maana: [ hay so siranoto a miyamaratiyaya na kalkn yo so Allah na go
tagakn yo so malalamba ko Riba "pananggilai niyo so Riba" upama ka
skano na miyamaratiyaya, na odi niyo phnggalbka na nanayawa niyo so
kambonowa a phoon ko Allah a go so Sugo iyan… ]
Pitharoi Abdullah ibn 'Abbas "ra"
[ aya maana a Ayat anan na so Tao a pkhan sa Riba a siyaparan na di
khasaparan na upama ka ad'n a Datu o mga Muslim na aya Kokoman yan na
phutaan sa Ulo ]
[3.] Mapapadalm san so kapangakal, kaplalalong, sabap sa iph'nggawi
iran ko mga Tao a angkawto a mga Benefit a miyamakalala a dibo khakowa
o Kadaklan, so members sii ko Kompaniya ibarat na tanto a maytoi
bilangan so p'phamaka kowa ron sa benefits, ayadn a kadaklan kiran na
daaba niyan p'khakowa labaw ron so miya ori mag member a go so da a
miyanga kokonvince yan!
Na piyaka Haram anan o Agama tano na go inisapar yan so kapaki
shinompata o ndalagid anan, madakl a Dalil san sa Qur-an a go Hadith…
Gya nan na maliwanag a kasalimbot na pitharo o Allah sa Qur-an
و لا تركنوا إلى الذين ظلموا فتمسكم النار... سورة هود 113
Maana: [ obakano paki thinabanga ko mga Salimbot ka mawlog kano sa Naraka ]
[4.] Giyanan na maka iibarat sa Anggan "Sogal" a iphaganggan o Tao
so Pirak yan, asar bo a maka pag member, sabap sa ayadn a Hadap yan na
giya angkawto a laba a khakowa niyan sii sa angkawto a piyangugopan yan
a Networking odi na Pyramid, na sii sa Islam na so mga Kokoman na sii
dii paka phashoda sii ko mga Hadap na go mga Ni-at
الأحكام تبنى على المقاصد و المعانى لا على الألفاظ و المباني
Na aya masosowa anan na maka iibarat a angkanan a Kompaniya sa
p'phanimo sa mga Pirak a phoon ko mga Tao a khabaya mag member, na so
miyanga oona mag member na sadn sa kala a miyaka member kiran na kala a
benefit iran, omann kawn pn so andang a pkha kowa iran sii ko
kompaniya, na go omann kawn pn a so kiyapag member yan sa angkawto a
galbk na di niyan masisigurado o phakalaba atawa ka di!!! Na
miyakasayan sa Anggan "Sogal" na miyakalala anan Haram sii sa Islam…
Pitharo o Allah sa Qur-an
يا أيها الذين آمنوا إنما الخمر و الميسر والأنصاب و الأزلام رجس من عمل الشيطان فاجتنبوه لعلكم تفلحون. سورة المائدة 90
Maana: [ hay so siranoto a miyamaratiyaya, mataan a so pakabrg a go
so kapaganggana "Sogal" a go so mga barahala na go so mga Kaprimar na
marshik a galbk a Shaitan, na pananggilai niyo ka angkano mamaka-apas ]
[5.] So katharo o miyakay san sa giyakon a mga benefit anan na knaba
Haram ka mga Gift kon anan, makasasayan ko sa pammgayan, na so
pammgayan na Halal, NA KNABA ANAN BNAR ka knaba anan pammgayan!
Na tharoon tap n a pammgayan na knaba langon a pammgayan na Halal,
ka so pammgayan na aya Kokoman yan na sa kokoman o kiyasabapanon.
Na giya angkanan a mga pammgayan iran na aya bo Sabap yan na kagiya
giya angkawto a kiyapaka pd ka kiran sa angkawto a galbk iran a Haram!
Go langon a pammgayan sii ko lagid anan na Riba, ibarat yan na ad'n
a utang akn rka na biyayadan akn ska na rakhs a uumanan akn sa isa ka
Kilo a Rice na haram oto obangka kowaa ka Riba! Sabap sa aya kiya bgi
ko rka sa pammgayan na kagiya piyagotangan akongka!
Pitharoi Abdullah ibn Salam "ra" sii ki Abi Bordah "ra" [ mataan a
ska na sii ka matatago sii ko ingd a madaklon so kapriba, na igira a
ad'n a pirak ka sii ko sakatao a Mama na bigan ka niyan sa pammgayan na
dingka khowa-a ka gyoto na Riba ]
Miyaka dakdakl pn a Dalil sa kiya Haram anan na da tano langon aloya
sabap sa tanto a phakatas, na so pphangdg sa bnar na kiyasokodanon so
sasatiman a Dalil na so giya baya a ginawa niyani pakapangongondaya-an
yan na diyon bo phaka rarad so piranggibo a Dalil…
PONTOSAN :
So langon a maka Sosold sa angkanan na Networking odi na Pyramid na Haram Haram Haram!!!
Apiya antonaa dni ngaran yan! AVON | DXN | TVI | Vmobile | GVMC | go
so laaaaaaaangon a lagid anan odi na maka sosolagidon,,, na mlagilagid
sa kokoman…
VGMC :
Malo tano ron aya osayn ka mindakl aya a tanto sa Ranao, na go taman ko mga Tao a mala-on so Agama na minisowasowa saya…
Aya VGMC na: Virgin Gold Mining Corporation
Aya okit yan na lagid dn a miya aloy tano anan a maka member ka mambo na phangonvince ka sa mga pd a Tao…
Aya membership yan na 60,000 php!
Na aya kibibida iyan na knaba ka iran dii pakandaganga, ka asar bo a
miyaka mimbro ka na oman sawlan na ad'n a Laba ngka a 10% o membership a
60k…
Na sadn mambo sa kadakl a ma convince ka ka kala a benefit a pkhakowangka…
Na Haram anan sa lagid dn a kiyapagosaya tano ron anan, na salakaw pn sa mga Dalil anan a miyanga aaloy na:
Giya angkawto a kattndo-a ko Laba o member sa 10% o 60,000 sii ko uman sawlan, maana: 6000! Na miyakalala anan a Haram!
Sabap sa miyatndo so Laba ngka sii ko sawlan…
So kiyab'gayngka sa 60,000 na tindo so Labangka sa 10% maana: 6,000!
na khapakay a si aki oto na aya malaba niyan ko sawlan na takp so
60,000 na aya bo a inibgay niyan rka na 10%, khapakay pman a malogi
siran na ph'mb'gan ka iran dn sa 10%!
Na gyanan na pd sa "Gharar" miyawna dn so kiya osaya tano ron sa kababaloy niyan a Haram…
Pamangnin tano ko Allah a tawfikan tano niyan sii ko kinggolalan ko
Agama niyan, ilidas tano niyan ko mayto mala a Kadosaan… Aameen…
Inisurat i:
Abuhazim Muhammadata Ibrahim
Islamic University
