KOKOMAN O KABATIYA SA QUR-AN A KAPLAGOLAGO

KOKOMAN O KABATIYA SA QUR-AN A KAPLAGOLAGO

( Q. )
AL-Muslima AL-Assila


Mga Ariya anto nai kokoman a Giya kabatiya sa Quran a kapelago... phamaka segad tasa kapiyaniya... babnara Bida'h?

( A. )
Al-Farooq Al-Mowaffaq


Assalamo 'Alaikom w.w.


So raknon a kailay go miyatharo o shaikha kiya kowa-an akn sa "Sanad" sa Qur-an na Bid'ah anan sabap sao so kabatiya sa Qur-an na Simba, na wajib a mi okit ko okit a kiyabatiya o Nabi "saw" a go so mga Sahabah "ra" sa Qur-an...


Na knaba lagid anan i kabatiya iran sa Qur-an, odi ako kharibat na sii anan miya anad ko mga Egyptians...


Salakaw san pn na gya angkanan a kabatiya sa lagid anan na obatadn ph'ndirogoda na aya dn a raramigan sa ni-at o ph'mbatiya na kapagambog, kapaki-ilayn sa kapiya i sowara... Na miyada so hadap ko kabatiya sa Qur-an...


Wallahu A'lam... Oba adn a phakato-on sa Hadith a upama na so mga Sahaba "ra" na lagid anan i kabatiya iran sa Qur-an na tharo-a niyan ka anta pkhatokawi...


Aya miyato-on akn na katharo o ibn Mas'ood "ra", pitharo iyan [ di niyo ph'mbatiya-a so Qur-an sa maka sasayan sa kabatiya sa darang'n "tobathobad" ] na mararani ron a angkanan a lagidanan a kabatiya...


Pitharo o Nabi "saw" [ sa di niyan iplagolago so Qur-an na di rkami pd ] Hadith


ogaid na so mga Ulama a Qur-an, sii ko kiyapakashompasompat o "Sanad" o Qur-an na miyagayonayon siran ko okit a kiplagolagon ko Qur-an... A lagid a kiplagolagonon anan sii ko kapagimam...


Miya aloy ko kitab a ( طبقات الحنابلة )

سئل الإمام أحمد رحمه الله عن قراءة القرآن بالألحان فقال : هذه بدعة لم تسمع عن السلف!

Maana: Ini-isha ko Imam Ahmad so kabatiya sa Qur-an a kaplagolago "lagid i Abdulbasit" na tigyan: Bid'ah anan, da makin'g ko mga Salaf!

Na tanto anan a marayag...



Ibn Al-Islam


Masha Allah masagogod anan guro ami... Langun a mia ilayakun na miakasanad sa Qur-an na aya kabitiya iyan na datar o kapagimam


Paganayrun Amer guwaknbo Guro na kailangan na mawsayengka angkaya ptharoon na Sanad para saboten o mga taw a dirun sumasabot kagea Bayrandn pkan'g e ptharoon na Sanad.,,,,




Al-Farooq Al-Mowaffaq


Aya p'tharo-on a Sanad na so kiyapakathondotondog o kapaka popo-on o bityara... Ibarat na pitharo o Nabi "saw" a so Kapamangaroma na sunat, na miyapanothol oto i Abu horayrah ibarat, na miyapanothol pman i Polan na miyapanothol pman i Polan a miyakin'g yan ibarat sa miyamanotholon oto, taman sa mini oma ki Bukhari... Na giyanan i Sanad, na o Correct so Sanad ka palaya mga papasang a Ulama a kiya okitan o katharo na correct so tothol... Opman o adn a sakato bo a kiya-okitan yan a Bokhag na di bnar so tothol... Gyanan i Sanad na sii anan ko mga tothol... Lagid o Hadith...


Na so Sanad sa Qur-an na so kiyakin'ga o Jibreel "as" ko Qur-an sii ko Allah, na miyakin'g pman o Nabi "saw" ko Jebreel "as" na miyakin'g pman o mga Sahaba "ra" ko Nabi "saw" na miyakin'g pman o mga Tabi'een ko mga Sahaba "ra" taman sa miyakawma ko masa imanto... Gyanan i Sanada...


Na sa miyaka kowa sa Sanad na aya maana niyan na mikaka-ip yan so okit a kiyabatiya-a ko Qur-an... So okit a kiyabatiya-a ron o Nabi "saw" sa dadn a bawn ribat... ( sii ko kaph'mbalsa ron )...


Na Alhamdulillah ka giya Sanad a mini oma ko pagari niyo na ika 21 ipoon ko Nabi "saw"...


Aya okit a kakowa sa Sanad na mbatiyaan ka so Qur-an sa knabangka phagilayn ipoon sa Fatiha taman sa Sorato Nas sii ko Shaikh a maka kokowa sa Sanad na khoriksiyonan ka niyan na o adn a dingkawn khasowa na dika phakakowa sa Sanad... Na lagidoto dn i kapaka thotondotondog yan taman ko Nabi "saw"...

================================


[ II ]
SO KIPLAGOLAGON KO QUR-AN


Pitharo o Nabi "saw":
من لم يتغن بالقرآن فليس منا... الحديث
Maana: Sa Tao a di niyan iplagolago so Qur-an na di rkami pd...

Pd anan a Dalil o mga Tao a Papakayn iran so lagid o kabatiya i AbdulBasit Abdussamad...

Na kna-oba iran anan khi Dalil...
ثبت عن النبي صلى الله عليه و سلم في حديث رواه مسلم ثناؤه للذي يتغنى بالقرآن يجهر به
So Nabi "saw" na biyantog yan so dii Mlagolago ko Qur-an, P'phakatanogn yan!

I Say: sii sa Hadith anan na piyakarinayag o Nabi "saw" a aya maana o kiplagolagon ko Qur-an na so kabatiya-aron sa matanog...

Pitharo i ibn Qayyim rahimahullah sii ko kitab yan a ZAD ALMA'AD:
و التغني بالقرآن يكون بالفطرة، لا بالصناعة و لا التكلف و لا المبالغة
Maana: So kiplagolagon ko Qur-an na so tabi-at a kabatiya, knaba kaplagolago a piyagantang, go knabawn p'phakapasangi a ginawa, go knaba kapanobra!

Giyanan i kabatiya o mga Al-Salaf Al-Salih, miyanga uuna-an tano ko mga Sahabah "ar" a go so mga Tabi'een...

Na so kabatiya i AbdulBasit Abdussamad na mapapadalmon a angkanan a Tlo pitharo i Ibn Qayyim a di khapakay ko kabatiya, mapapadalmon so kababaloy niyan a kaplagolago a Piyagantang, knaba oto tabi-at, aya tabi-at a kabatiya na so kabatiya a kalalayaman, mapapadalmon a angkawto a tanto a kap'khapasangi sa ginawa, ka ilayangkadn ka samabo di pliyowi a ogat a Lig yan amay ka ph'mbatiya, mapapadalmon so kap'phakasobra niyan, maana: mishobra so kiyapagantanga ko Kaplagolago na goso kap'khapasangi ko ginawa...

انظر كلام ابن القيم قي كتابه المسمى بزاد المعاد

Na miyawna pn so kiya aloya tano ko katharo o Imam Ahmad rahimahullah a ini isha-on so lagid anan a kabatiya na pitharo iyan:
هذه بدعة لم تسمع
Maana: Bid'ah anan a da makin'g ko mga Salaf...

هذا في كتاب: طبقات الحنابلة

Na sopman so pd a Dalil o sabaad a inokon bo p'phagimam'n o pd a Imam sa Saudi so lagid oto a Kabatiya oba marata?

Na tigakn: Andangka miya batiya a khapakay a kowa-an ka a Dalil so Galbk o lagid ka a Manosiya?

Ikadowa: Antai mala a Ulama sa Saudi a miyatya sa lagid anan? Sa Madinah a go Makkah mini pagimamon so lagid anan?

Ikatlo: Apiya badn i kala iyan a Ulama sii ko masa imanto o masopak o Galbk yan so Piyagayonayonan o mga Salaf na di khapakay a kowaan a Dalil...

Tigiran pman: P'khababayaan kon i Ibn Al-'Othaymeen rahimahullah so kabatiya i AbdulBasit...

Tigakn: Oway miyabatiya akn anan sa Google! Na daa reference yan, daa tod yan, daa misosoraton a Marja'...

Na khapakay a di Bnar ka matag tothol a Tao a dita katawan i btad yan!

Na ibtad ta sa Bnar na sa Usolol Fiqh na igira a miyaka shopaka so tindg o Dowa a Ulama a dingka katawan o anday mabagr kiran i Dalil na aya wajib a kawnotan ka sa mas Mala kiran i Katao...

Na Pakaisha: Antai mala i Katao ki Ibn Al-'Othaymeen a go si Imam Ahmad a go si Ibn Al-Qayyim???
Ikalimo siran langon o Allah...

Salakaw san pn na upama ka ska na khasowa aka milay so mga Dalil ka morit ka na ba aya okit a kabgay sa Kokoman amay ka miyaka shopaka so dowa a tindg sii ko Mas-alah na aya phili-in ka na sa maka aayon ko pamikiran ka a go sa kabaya aka? Anda anan maka pupu-on a Ilmo?

Antawa-a ka pagilayn ka so mga Dalil o dowa a tindg na sa maka aayonon ko mga Usol o Agama na ayangka tharima-an?

Turo-on tano o Allah ko titho a Lalan na go itawfik yan rkitano so kabaloy o Puso a linang na go mawatan ko mga rarata a pamikiran...

SO 'AQEEQAH

SO 'AQEEQAH

Kokoman o 'Aqeeqah:

Aya Kokoman yan na Sunnah...

Pitharo o Nabi "saw" [ مع الغلام عقيقة فأهريقوا عنه دما و أميطو عنه الأذى ] Adn a 'Aqeeaqah o Wata, na pakatuga-i niyo sa Rugo, "sumbalii niyo sa Kambing" go kowaa niyoron so Bok yan "pagopawan. Piyanothol i Bukharie!

Pitharo iyan pn [ كل غلام رهينة بعقيقته، تذبح عنه يوم سابعه و يسمى فيه و يحلق رأسه ] Langon a wata na mithatagpda iyan so 'Aqeeqah niyan, shombali-inon sii ko ikapito niyan gawii ko kinimbawata-anon, go mbthowan sa ngaran go pagopawan. Piyanothol i Tirmidhee!

Pitharo iyan pn [ عن الغلام شاتان و عن الجارية شاة ] So bagowamama na aya shombaliinon na Dowa a Kambing na so bagowaraga na Satiman. Piyanothol i Imam Ahmad go pitharo iyan a Hadith a Sahih "sound"!

Pitharo i Ishaq ibn Hanie: ini isha akn ki Ahmad Ibn Hambal so Hadith a manonompang sa angkaya a 'Aqeeqah na pitharo iyan [ Sunat anan o Nabi "saw" ]

Adn pman a sabaad ko mga Ulama a pitharo iran a Makrooh so 'Aqeeqah ogaid na mga Lolobay siran i Dalil.

Ino khab'thowi sa 'Aqeeqah?

Pitharo i Abu 'Obaid a pitharo kon i Al-Asma'ee [ aya 'Aqeeqah na so Bok o wata sii ko kinimbawata-anon, na mini b'tho ko kambing a p'shombaliin sabap sa sii sa kasombali-a sa angkawto a kambing na pagopawn sa wata oto a angkawto a Bok yan ]

Na si Imam Ahmad ibn Hambal na da san maka ayon, aya tigyan a ph'mbthowan mismo sa 'Aqeeqah na giya angkawto a kashombali sa kambing!

Pitharo akn: Bnar a gyoto i ph'mbthowan sa 'Aqeeqah a kashombali oto sa Kambing, ogaid na aya sabap yan na giya miya aloy oto i Al-Asma'ee... Samawto na knaba maka shosopaka a dowa anan a katharo!

So Oras o 'Aqeeqah:

Pitharo o mga Ulama [ Aya Mapiya na sii ko ikapito gawii ka gyoto i miya aloy ko Hadith, na odi khaparo na sii ko ika dowa a pito gawii, na odi khaparo na sii ko ikatlo ]

Pitharo i ibn Qayyim rahimahollah [ aya Bnar na sadn sa kap'khasambot yan na aya niyan kapiya, na sadn sa kaphakaparo niyan na khapakay pn oto ]

So kapamutola ko Tulan yan na Makrooh:

Pitharo i Imam Ahmad a go si Imam Al-Shafi'ee rahimahomallah [ so 'Aqeeqah na di phamutoln so Tulan yan, uman i tulan na sii phutola ko shu-oran yan ]

Pd a Hikmah san na arati sa kalokalo na mabagr i Tulan so Wata, go mapiya i kambobolawasan...

So Idad a Kambing a khapakay a Sombaliin sa 'Aqeeqah:
 
Pitharo i Abu 'Omar ibn 'Abdilbarr rahimahullah [ miya Ijma' "miya ta-ayon" so mga Ulama a di khapakay sa 'Aqeeqah inonta bo na so khapakay sa Odh-hiyah, inonta bo so pd a mga Ulama a dii khapakay a pkhowaan so katharo iyan ]

Aya Odh-hiyah na so tig tano a Qurban... So p'shombaliin igira a Eid Al-Adh-ha...

Na Pakaisha: antona khapakay a Idad sa Odh-hiyah?

Miyagayonayon so mga Ulama sa di khapakay so da maka saragon, sabap ko katharo o Nabi "saw" [ Di kano shombali inonta bo na so Miyaka saragon, inonta obakano di phaka toon na khapakay so miyaka nm olan a bilibli ]

Kay so Bilibili na Mala, na so Kambing na mayto, na sii rkitano sa Pinas na daa ba Bilibili ka Kambing bo!

Bali sabap san na miyagayonayon so mga Ulama sa basta a kambing a matag miyaka nm Ulan na di khapakay, aya bo a khapakay na miyaka saragon! Sabap ko Hadith a adn a sakatao a Sahabie a miphanon ko Nabi "saw" a dakon a khatoon yan a kambing a miyaka saragon na ayabo a rk yan na matag miyaka nm ulan ogaid na matiwaro, na pitharo o Nabi "saw" [ يجزيك و لا يجزي جذع عن أحد بعدك ] Khapakay rka, na di dn khapakay sa apiya antaa sii ko oriyan ka!

Na apiya igira a Bilibili na adn a mga Ulama a da niyan pakaya so matag miyaka nm Ulan sabap sa giya Hadith anan na Rangkom... Ogaid na aya bnar na khapakay so miyaka nm Ulan a bilibili amay ka da a khatoon a miyakasaragon a Kambing sabap sa Hadith oto a miya Aloy!

Aya di khapakay a piyagayonayonan o mga Ulama na so matag miyaka nm ulan a Kambing! Kailangan na so miyaka Saragon!

Na so sabaad ko miyanga uuri a Ulama na apiya so Kambing a miyaka nm ulan matag na piyakay niyan asar kon a Matiwaro! Na malobay anan a katharo sabap sa ayadn a miyasopak yan na so katharo o Nabi "saw"!
Ino khapakay a ipagaqeeqah so Sapi odi na Onta?

So Sabaad ko mga Ulama na da iran anan pakaya sabap sa aya miya aloy o Nabi "saw" na [ Dowa a Kambing ko Mama na Satiman ko Babay ] Hadith

Na so Imam Malik na piyakay niyan, ogaid na mas mapiya kon so Kambing a diso Sapi, na go mas mapiya so Sapi a di so Onta!

Antonai ikhidi-a ko 'Aqeeqah?

Pitharo i Imam Ahmad rahimahullah [ so 1/3 yan na iphammgay ko mga siringan na so khalamba-on na kh'n o Pamilya ]

Pitharo i ibn 'Abdil Barr a pitharo kon i Imam Malik rahimahumallah [ so 'Aqeeqah na di ron thimo-on so Tao sa lagid o Kandori, kailangan na sii mawit ko mga walay o mga Tao a mbganon so rkiranon ]

So da ma 'Aqeeqah sii ko kayto iyan, ino phag 'Aqeeqah sii ko kiyapakala iyan?

Ini isha anan i Esma'eel ibn Sa'eed ki Imam Ahmad na tigyan a sii oto ko Ama iyan! Maana: ayawn pagakika na so Ama iyan!

Na o so Tao na Akika-an yan a ginawa niyan sii ko kapakala iyan na mapiya oto, khapakay! Gyanan i katharo iyan!

So ka-opawi ko Wata:

Miyawna so kiya aloy o Hadith a pitharo o Nabi "saw" a pagopawan so Wata sii ko kasombali-a ko 'Aqeeqah niyan...

Na antonai okit yan?

Aya okit yan na kailangan na langon kawpawan a Ulo niyan, ka ini sapar o Nabi "saw" so ka-aloti ko saba-adon a go di pagalotan so saba-adon! Hadith anan a miyapanothol i Bukharie a go si Muslim!


Sii anan langon khabatiya ko kitab a:
تحفة المودود بأحكام المولود لابن قيم الجوزية رحمه الله
Na so maka pantagon ko Idad a kambing a khapakay sa Odh-hiya a gyoto i khapakay sa 'Aqeeqah na sii ko kitab a:
بداية المجتهد و نهاية المقتصد لابن رشد الأندلسي رحمه الله
Inisurat i: AbuHazim Ibrahim

SO SABAAD KO MGA KINANGLAN A KATOKAWAN MAKA PANTAG KO IKHWAN AL-MUSLIMON

SO SABAAD KO MGA KINANGLAN A KATOKAWAN MAKA PANTAG KO IKHWAN AL-MUSLIMON

بسم الله الرحمن الرحيم

Gya angkai a umpongan na paparatiyayan tano a mga Ahlussunnah a umponga ini a mapiya i Apta, mapiya i Hadap, mala i panagontaman sii ko andamanaya i kapagomarg o kapiya a kigogoris o Agama, mala i panishakay ko Jihad na go so kapaka borantaw o Islam...

Aya mitha-ong sii na si aki ini a Hasan Al-Banna rilaan skaniyan o Allah....

Ogaid na aya tanodan tano na knaba aya bo a pagilaya na o antonaa i antap o Tao ko galbk yan ka kailangan na maylay pn o antonaa i Okit yan! Ino mangaday ba giya angkawto a okit yan na gyoto i Lalan sa angkawto a Hadap yan?

Sii ko kiyasapari o Ibn Mas'ood "ra" ko mga Tao a dii nggagalbk sa Bid'ah na aya pitharo iran na:
( يا أبا عبد الرحمن ما أردنا إلا خيرا )
Hay Amai Abdurahman na dadn aki a Hadap ami a romowar ko Mapiya!

Na pitharo iyan:
[ و كم من مريد للخير لم يصبه؟؟؟ ]
maana: Ba pira pira i Tao a kabaya iyan so Mapiya na da niyan masogat???

Na si Hasan Al-Banna ikalimo o Allah na pitha-ong yan a angkanan a Umpongan yan sa sii niyan piyaka phashod sii ko panarima iyan!

Na skaniyan na Ash'aree a Sofie... Sii niyan anan mismo pitharo ko Kitab yan a "RASA-IL", Sakn a tigyan na aya Panarima akn na Panarima a Ash'ariyyah na aya okitokit akn na Okitokit a Sofiyyah...!

Na katawan tano dn so mga Asha'irah a go so kadadadag o mga Sofie...

Na so lagid anan a Tao na ron ka isharig so kakhato-onangka ko Ikhababaya rka o Allah?

BA AYA BO A KABALOY NGKA A MUJAHID NA MAKA PAGINGARAN KA SA IKHAWAN? BA SO MGA SAHABAH "RA" NA PD SIRAN KO UMPONGAN A IKHWAN?

Na ditano balowin a ginawa tano a Mala i maraabat ko Umpongan tano a pitha-ong a Manosiya a makasisilay!

Knaba aya kapangataki ka matag dii katharo-a ko Bnar... Pitharo o Nabi "saw":
[ قل الحق و لو كان مرا ]
Maana: tharo-angka so Bnar sa apiya i kapa-it yan...

Sabap sa so mga Muslim na magariyari go pitharo o Nabi "saw" [ so Muslim na pagalongan o Pagari niyan ] Hadith

Na sabap san na tanto a marayag so karibatan a pkhasugok o mga Ikhwan, lagid katharo iran ah miyakalala a pashodan iran ko kanggrupo:
[ نتعاون فيما اتفقنا عليه و يعذر بعضنا بعضا فيما اختلفنا فيه ]
Maana: pthatabangaan tano so piyagayonayonan tano na go ph'mama-apa tano ko ditano phagayonayonan!

Na giyanan na ayadn a miyasopak yan na so katharo o Allah, pitharo iyan sa Qur-an:
[ فإن تنازعتم في شيء فردوه إلى الله و الرسول إن كنتم تؤمنون بالله و اليوم الآخر ]
Maana: Amay ka adn a di niyo phagayonayonan na Ndodn yo ko Allah a go so Rasulollah amay ka skano na paparatiyaya-aniyo so Allah a s goso Alongan a Mawri...

Knaba aya pitharo o Allah na pmama-apa kano!!!

Gyanan i sabap a adn a Ikhwan a Shi'ah, adn a Sofie, adn a Zaydie, adn Ash'arie, adn a Ibadhie...adn a.a.a.a...... Adn pn a Christian imanto a pd sa Ikhwan...!!!

Oway, kailangan so kapmama-apa! Ogaid na sii ko mga Shayi da a kitotompok yan ko Agama! Lagid ko ibarat na marompak ka o pd ka na maapingka!

SO SAPULO A MGA POLA-OS O BAY'AH SII KI HASAN AL-BANNA

الفهم، الإخلاص، العمل، الجهاد، التضحية، الطاعة، الثبات، التجرد، الأخوة، الثقة
هذه عشرة
( Sabot, Ikhlas, Galbk, Jihad, Nasiehah, Kapangungunotan, Kathakna, Kapananggilai "ko mga rido-ay o Agama", Kaphapagariya, Sarig ) Sapulo anan langon!

Na Paparatiyaya-an tano a giya angkanan a Sapulo na kailangan anan sii ko Muslim...

Ogaid na kataya so kiyapaka silay san o Ikhwan a kiyabaloy a angkanan a Sapulo a Bid'ah a miyakasopak ko Okit o Nabi "saw"!:

Giyanan i Biyaloy niyan a mga Pola-os o Bay'ah sii sa Islam "kapasadan"!

Na katawan tano langon a so Bay'ah na simba, pitharo o Nabi "saw" [ sadn sa Matay a daa Bay'ah niyan na miyatay a lagid o sii miyatay ko Masa a Jahiliyyah ] Hadith

Na si Hasan Al-Banna na mimbaal sa mga Pola-os o Bay'ah, a obadi papasadn dn o Nabi "saw" so mga Pola-os o Agama!!!

Pitharo o 'Obadah ibn Samit "ra"
[ بايعنا رسول الله صلى الله عليه و سلم على السمع و الطاعة في المنشط و المكره و أن لا ننازع الأمر أهله و أن نقول بالحق حيثما كنا لا نخاف في الله لومة لائم ] رواه البخاري

Maana: Mimobaya'ah kami ko Nabi "saw" sa: Kapamamakin'g na go Kapangungunotan, sii ko Masa kapipiya a ginawa na goso karrgni sa Ginawa "sa Hirap at Ginhawa", go di ami pagagawn so Kadatu ko Khirkon, go so katharo-a ko Bnar sa apiya anda kami matatago, go di ami ikhalk sii ko Allah so katharo o apiya Antawa-a!!!

Na gyanan i mga Pula-os o Bay'ah! Na salakaw a dii ipam'khit i Hasan Al-Banna... Ikalimo o Allah...

Na Pamamikira niyo anan ka tanto a marinayag!

SO TINDG I HASAN AL-ABANNA MAKAPANTAG KO MGA YAHODIE

Pitharo i Hasan Al-Banna sii ko kini pmeetingn yan ko Lojnah a America bo Bretain sii sa Egypt maka pantag sa Palistine:

[ Mataan "a tigyan" a giya angkaya a p'kharido-an rkami a go giya angkaya a mga Yahodie na knaba sabap sa Agama, ka so Qur-an na ini sugo iyan so kingginawa-in kiran a go so kimbolayokaan kiran, go biyantog siran o Allah go bigan kami niyan sa kapasadan, pitharo iyan sa Qur-an "go dikano dii paki phawala ko mga Yahodie inonta bo na makawkit sa Mapiya" ]

Katatan so katharo i Hasan Al-Banna a mitha-ong ko IKHWAN makapantag ko mga Yahodie...

KNABA KON SABAP KO AGAMA A KAPKHARIDO O MGA MUSLIM A GO SO MGA YAHODIE!!!

Subhanallah... Antonaa? Antonaa mangaday? Politica? Skano dn i matao san!!!

Sii anan khatoon ko Kitab a:

الإخوان المسلمون ، أحداث صنعت التاريخ ١/٤٠٩

SO TAWASSOL

SO TAWASSOL

[ I ] So maana o Tawassol sii ko basa a Arab:

Sii anan kinowa ko katharo a Waseelah…

Pitharoi Al-Raghib Al-Asfahanie:
الوسيلة: التوصل إلى الشيء برغبة
Maana: Aya Waseelah na so kapangilay sa okit sa kaparoli o Shayi sa makawkit sa Skl a ginawa "Babaya"!


[ II ] So Tawassol sa Qur-an:

Na giyanan dn mamboi maana o Tawassol a miya aloy sa Qur-an…

Pitharo o Allah:
يَا أَيُّهَا الَّذِينَ آمَنُوا اتَّقُوا اللَّهَ وَابْتَغُوا إِلَيْهِ الْوَسِيلَةَ
Aya maana  iyan a tigo Imam o mga Pananapsir a si Tabarie: Hay so skano a mga Tao a piyaratiyaya iran so Allah a goso Sugo iyan na Kalkn yo so Allah sa nggalbka niyo so mga sugu-an yan na go pananggilai  niyo so mga inisapar yan NA GO MBABANOG KANO SA KAPAKARANI NIYO RON SA MAKANGGOLALAN KO MGA PIPIYA A GALBK!

Maana: Sabap sa Pkhababayaan yo so Allah na aya okit a kakhaparoliya nyo ko babaya iyan na so kanggalbk yo sa mga pipiya a Galbk! Aya okit odi na Waseelah sa kaparoliya niyo ko Babaya o Allah na so mga pipiya a Galbk!


[ III ] So Maana o Waseelah sii ko Kiyawsarawn sa Islam:

Aya Waseelah: Na so okit a khasabapan sa kakhaparoli o singanin!
تفسير ابن كثير "2/52-53"

Na samawto na aya TAWASSOL na so kapangilay sa Okit!

[ IV ] So mga pipiya a Galbk na aya bo Okit "Waseelah" sa kaparoli o Babaya o Allah, dadn a salakaw ron!

Lagid a kapaka rarayag yan sa angkanan a kiyatafsira o Imam Tabaree sa angkanan a Ayat a miya Aloy.

Na aya piyakammsa na so sabaad ko mga Tao a dii magingaran ko Ilmo na iphndalil iran a angkanan a Ayat sii ko tindg iran a Marata sa kapapakaya iran ko dii kathawassoli ko mga Nabi a miyamatay dn a go so salakaw kiran!

Na mala anan a karibatan ka masosopak yan so Nda-owan o Qur-an a go Hadith a go so mga Sahaba "ra", so mga Sahaba "ra" a go so mga Tabi'oon "mga Salaf" na miyagayonayon siran sa ayabo a Waseelah a khiparoli ko Babaya o Allah na so mapapadalm ko Qur-an a go Hadith!

Pitharo o Nabi "saw":
تركت فيكم أمرين لن تضلوا ما تمسكتم بهما: كتاب الله وسنة رسوله... رواه الإمام مالك
Maana: Ini bagak akn rkano so dowa a nganin a dikano dn Madadag o aya niyo Thamli "Kh'piti": so Kitab o Allah a go so Sunnah o Sugo iyan!


Sabap san na kailangan a katokawan tano o antonaai mapapadalm a mga okit a kakhaparoliya tano ko Babaya o Allah a mapapadal sa angkanan a Qur-an a go HAdith!


[ V ] So mbarangan o Waseelah:

Miya osay tano a aya Waseelah na so Okit a kap'kha paroli o Singanin, na dowa anan Barang:

1.) Waseelah Kawniyyah: Maana – Okit a manonompang sii ko Kiyapangadn o Allah, na mlagid san so Mu-min a go Kafir, go so langon a kaadn o Allah.

Aya ibaratan yan na so Kaynom! So kainom na okit a kada o Kawaw, maana: so Ig na waseelah sa kada o Kawaw!

2.) Waseelah Shar'iyyah: Maana – Okit a manonompang sii ko Agama, na sii bo anan ko Mu-min.

Na giyanan so mga Waseelah a inaloy o Allah a go so Sugo iyan a okit a kaparoli o Sorga a gyotoi Antap tano!

Aya ibaratan yan na so kashambayang! So kashambayang na Okit sa kapaka sold sa Sorga, maana: Waseelah sa kapaka sold sa Sorga!

Na so kashambayang na so ka THAWASSOL ko sambayang! Maana: kabaloya ko Sambayang a okit a kaparoli o Sorga.


[ VI ] So TAWASSOL a khapakay a go so mbarangan yan:

Kiyatokawan tano a ayabo a khapakay a Tawassol sii ko Agama na so maka aayon ko Qur-an a go Hadith, na langon a Tawassol a maka susupak ko Qur-an a go Hadith na di khapakay na ilayn tano imanto antonaai mapapadalm ko mga Dalil sa pakawatanan tano so Kibr na go Maratabat…

Aya mga Tawassol a Khapakay sii sa Agama a okit a kaparoli o singanin na TLO barang, miyanggonanao anan o Qur-an a go Hadith:

1. ) So ka thawassol ko mga Ngaran o Allah a go so mga Sipat yan!

Pitharo o Allah sa Qur-an:
وَلِلَّهِ الْأَسْمَاءُ الْحُسْنَى فَادْعُوهُ بِهَا... سورة الأعراف
Maana: Go ad'n a mga ngaran o Allah a mga Pipiya na Pamangni kano ko Allah "Du'a" sa maka okit ko mga ingaran yan!

Ibarat: so Allah na ngaran yan so A-Lrahman "Malimo" na nggiraw ka a ya Rahman "Hay Malimo" na kalimoon akongka, rilai akongka…etc…

Maana: Baloya niyo so mga Ngaran o Allah a okit sa kapamangni sii ko Allah…

2.) So ka thawassol o Tao ko mga Galbk yan a Mapiya!

Ibarat na nggiraw a: Ya Allah na sabap ko paratiyaya akn rka, na go so mga Powasa akn na go so mga Sambayang akn na rilai akongka.

Pitharo o Allah sa Qur-an sii ko pd a mga Sipat o mga Mu-min:
الَّذِينَ يَقُولُونَ رَبَّنَا إِنَّنَا آمَنَّا فَاغْفِرْ لَنَا ذُنُوبَنَا وَقِنَا عَذَابَ النَّارِ... سورة آل عمران
Maana: So siranoto a mga Tao a diiran tharoon a hay Kadnan ami na mataan a skami na Piyaratiyaya ami ska na rila-an ka rkami so mga Dosa ami na go pakalidasa kamingka ko Naraka…

3.) So ka thawassol ko malai Agama a Oripn o Allah a oyagoyag!

Aya Sharat na Oyagoyag a angkawto a Tao…

Ibarat na so Tao na ad'n a awida akal yan, na shong sii ko Tao a mala-on so Agama na nggiraw a pagariko pangniyangka rakn ko Allah a tabangi ako niyan…

Na khapakay pn anan…

Aya pd a Dalil san na:
ما رواه أنس بن مالك - رضي الله عنه - أيضاً أن عمر بن الخطاب - رضي الله عنه - كان إذا قحطوا استسقى بالعباس ابن عبد المطلب، فقال: اللهم إنا كنا نتوسل إليك بنبينا صلى الله عليه وسلم فتسقينا، وإنا نتوسل إليك بعم نبينا فاسقنا، قال: فيُسقَون. رواه البخاري
Maana: Miyapanuthol o Anas ibn Malik "ra" a so 'Omar ibn Al-khattab "ra" na igira a lomiya-on a didn pagoran na dii thawassol ko 'Abbas "ra" a Bapa o Nabi "saw", dii niyan tharoon: ya Allah na mataan a skami na dii kami thawassol ko Nabi "saw" sii ko kawyagoyag yan na p'phakawranan kamingka, na imanto na p'thawassol kami ko 'Abbas "ra" a bapa iyan na paki orani kamingka, na phagoranan siran! Piyanothol I Bukhari

Note: So 'Abbas "ra" na oyagoyag, na o khapakay so ka thawassol ko miyatay na didn p'thawassol so mga Sahaba "ra" ko Bapa o Nabi "saw" ka sii siran dn p'thawassol ko Nabi "saw" ka dadanga-aniran so Koba niyan!

وروى ابن عساكر بسند صحيح أن الضحاك بن قيس خرج يستسقي بالناس فقال ليزيد بن الأسود: قم يا بكاء! زاد في رواية: "فما دعا إلا ثلاثاً حتى أمطروا مطراً كادوا يغرقون منه...
Maana: Miyapanuthol o ibn 'Asakir a si Dhahhak ibn Qays rahimahullah na lominiyo a iphamangni niyan so mga Tao sa Oran na tigyan ki Yazeed ibn Al-aswad: Tindg ka hay Tagora-ok na goka pamangni sa Oran, na pd a miyapanuthol na miyakatlotlo maka pamangni na inuranan siran sa Oran a o alangalang na khigald siranon…

Note: tigyan a Tindg ka hay Tagora-ok, Maana: Tagora-ok sa kala iyani kalk ko Allah…


[ VII ] Langon a Waseelah a salakaw sa angkanan a Tlo a miya aloy na di khapakay, Haram!

Giya miya Aloy anan a TLO barang na giyanan boi TAWASSOL a khapalay a miyanggunanao o Qur-an a go Hadith, na so langon a salakaw san na di khapakay, ad'n a miyakay ron ogaid na sii ko mga di phagayonayonan na aya phagilayn tano na so Dalil na sa maka sosogat ko Qur-an a go Hadith na aya tano khowaan na sa makasosopakon na phananggila-an tano!

Na so langon a Tawassol a salakaw sa angkanan a Tlo a miya Aloy na di khapakay sabap sa daa baniyan Dalil!

Na giyanan na Simba anan, na aya paka asal ko mga Simba na Haram so simba taman sa daa matuoon a Dalil a makanggugunanao ron…

> MGA IBARATAN:

(a.) Lagid o ka thawassol ko miyamatay a go so mga Koba o miyamatay, na miyakalala anan a KAPANAKUTO! a o matay so Tao a di niyan anan ma tawbat na miyatay a Kafir!

Ibarat na shong so Tao ko Koba o Nabi "saw" na nggiraw Hay Rasulallah na tharo-angka ko Allah a rilai ako niyan!

Odin a apiya antaadn a miyatay a mala-on so Agama…

P'khowaan a Okit sa kapakarani ko Allah na miyakalala anan a KAPANAKUTO a di iprila o Allah ko Tao!

Pitharo o Allah sa Qur-an sii ko pd a Sipat o mga Kafir:
وَالَّذِينَ اتَّخَذُوا مِنْ دُونِهِ أَوْلِيَاءَ مَا نَعْبُدُهُمْ إِلَّا لِيُقَرِّبُونَا إِلَى اللَّهِ زُلْفَى... سورة الزمر
Maana: Go so siranoto a mga Tao a kominowa siran sa mga tinabanga a salakaw ko Allah sa aya rason iran na ; ayaman a kap'phanganganaya ami kiran na angkami iran mapakarani ko Allah sa samporna a karani!
(b.) Lagid pn o ka thawassol ko Daradat o mga kaadn, so kagiraw niyan ibarat a: Ya Allah na sabap ko Daradat o Nabi "saw" odi na Daradat o Imam Malik odi na si Polan na rilai akongka! Odi na sodn so ginawa iran e alowin yan sa tharoon yan a: Sabap ki Giraw ibarat na rilai akongka ya Allah! Na kapanakuto pn anan…

Sa ayadn a Dalil yan na giya Ayat anan a miya aloy sa paganay a Ibaratan! Wajib ko Manosiya a maka direct mamangni ko Allah! Knaba pn khowa sa kawkitan yan a lagid yan a Kaadn…

فتاوى نور على الدرب للشيخ ابن باز رحمه الله

Mbida a go so ayangkawn pangnin na mipamangni ka niyan ko Allah ka gyotoi khapakay, lagid o kiya osaya tano ron ko ika tlo Barang o tawassol a khapakay! Ayabo a phangnin kawn na mipamangni ka niyan ko Allah sa skaniyn na oyagoyag!!!

Lagid o kiyatharo-a o Mama a di phaka ilay ko Nabi "saw" a hay Rasulallah na pangniyangka ko Allah a paka kasoya niya rakn so Mata akn…

Mbida so Miyatay a go so da Matay! Knaba maka phamangni so Miyatay!

Na sa Tao a mamangni ko Miyatay na salakaw pn sa kiyadosa niyan na khapakay a tharoon a skaniyan na kiyadaan sa Lalag! Sabap sa miyatay na apiya giya ginawa niyan na di niyan khatabangan!

Pitharo o Nabi "saw":
إذا مات ابن آدم انقطع عمله... الحديث
Maana: Igira a miyatay so Tao na miyapasad so mga Galabk "Amal" yan!


هذا... و صلى الله و سلم على نبينا محمد و على آله و صحبه أجمعين


Inisurat i: AbuHazim Ibrahim Abdulkarim

KOKOMAN O KABTHOWI KO TAO SA MAWLANA

KOKOMAN KO KATAWAGA A "MAWLANA" KO LAGID TA A MANOSIYA:

Smbag aya o Pakaisha o Babay tano a si Ashmah Bent Abdulrahman na aya dn a ismbag tano ron na so katharo o Mala a Ulama o Ahlussunnah wal Jama'ah a si Shaikh ibn Baz rahimahullah!

Oba pman gomiraw o Tao a miyangataki pman si Muhd.Ata! ka miya alin imanto so Masa ka tharoon ka so katharo o mga Ulama a maka sosopak ko tindg o sabaad na ska i diiron paka tharoon na dii pn pakambalsn sa salakaw a maana!

Inisha-an si Shaikh ibn Baz rahimahullah:

Q.) Antonaa i Kokoman o katawag ta a "MAWLANA" ko lagid ta a Manosiya?

Na Pitharo iyan:

A.) So katharo "word" a ( Mawla ) na madakl i maana, makaph'ma-ana sa Tinabanga, makaph'maana sa Datu, makaph'maana sa Tunganay, go maka ph'maana sa aya paka aantapanon na so Allah! etc...

Ogaid na aya dait na so kapananggilai san, sabap sa ayadn a kalilid a paka aantapan san na so Allah, so Allah i Tinabanga "Phanabang" ko mga Muslim...

Gyoto i sabap a inisapar o Nabi "saw" oba anan phmbthon ko lagid ta a Manosiya!

Pitharo o Nabi "saw":
لا تقل مولاي فإن مولاكم الله... رواه مسلم
Maana: Dingka dii tharo-a "ko Tao" so Mawlaya "Mawlana" ka mataan a aya niyo Mawla na so Allah... Hadith a piyanothol i Muslim!

Aya bo a miyapakay na so makapantag ko Oripn, khapakay a italo niyan ko khi oripnon so "Mawlay-Mawlana"!

Ka giyanan bo i tiyabiya on o Nabi "saw"! pitharo iyan makapantag ko Oripn:
أن النبي - صلى الله عليه وسلم - قال للعبد: وليقل سيدي ومولاي
Maana: Mataan aso Nabi "saw" na pitharo iyan [ so Oripn na aya talon yan ko Khi oripnon na: Saydie odi na Mawlay "Mawlana ]

Na inisolagid san pn o mga Ulama so mga Datu o mga Muslim!

SO MGA REFERENCE:

1. الصوتيات 267
2. فتاوى 5983
3. الإملاءات 636
4. نور على الدرب 12312

KOKOMAN O KIPANGAROMAN KO TAMOK (MAHAR "BTANG") A HARAM

KOKOMAN O KIPANGAROMAN KO TAMOK (MAHAR "BTANG") A HARAM
 

Smbag ini o pakaisha o isa ko mga pagari tano makapantag ko Mama a miyangaroma na aya mini btang yan na Tamok a Haram, antonai kokoman yan?

Ino makaph'mblag siran atawa ka di?

SMBAG:

Paganay ron na so langon a Tamok a Haram na di khapakay a ba phagosara ka Haram, na Haram oba ibtang na go Haram oba tarima-a o Bae so btang a Haram!

Na amay ka mini bulog a myakawing siran a aya mini btang o Mama na Tamok a Haram na pitharo o Imam Malik rahimahullah [ Wajib a makamblag siran a dowa, kiyasoldan yan atawa ka da na kailangan a map'ka so kiyakawing iran ] aya Dalil yan na lagid kon anan o kaphasa-i a basta a so arga na Haram na binasa so kiyaphasa-i na wajib a mabaroba so kiyaphasa-i...

Ogaid na malobay anan a tindg, sa kataya so Tindg tano ron:

[ So kiyakawing iran na korik dn oto ogaid na phakasunggod "phakabtang" a angkawto a Mama, sa aya khisunggod yan na lagid sa kala o kalalayaman a p'khisunggod ko mga Bae sii sa angkawto a Darpa! ]

Aya Dalil na so kakha korik o Kawing na knabawn sharat so kibgan ko Mahar sii ko unaan o dapn kapaka khawing, ka khapakay a makawing a daan a gobo aloya so Mahar, paga-ayonayonan anan o mga Ulama ka miya-aloy sa Qur-an!

Bali wajib dn ko Mama a makasunggod odi na makabtang, na odi mbtang na gyoto i kakhabinasa o Kawing iran, na makaphmblag siran ka odi Sunggod "Btang" na binasa so Kawing iran, pitharo o Allah sa Qur-an [ Go bgan yo ko mga Bae so Mahar iran ] Soratol-Nisa...

Na so kini solagid'non o Imam Malik sii ko kaphasa-i na mawatanoto a Dalil sabap sa mbida so kakhawing a go so kaphasa-i...

Gyanan i tindg o Abu Haniefah rahimahullah go odi ako kharibat na gyanan mambo i tindg o Shafi'ee rahimahullah... Wallahu A'lam...

ANGKAYNO ISLAM A PINAKA MAPIYA A OKIT SII KO KAPHAGIN-TAO?

ANGKAYNO ISLAM A PINAKA MAPIYA A OKIT SII KO KAPHAGIN-TAO?



Kagiya so Islam na ron bo khatoon angkai a mga nganin:


1.) So bitikan yan, mga kokoman yan na di maphamagalin sa taman sa bangkit!

Pitharo o Allah sa Qur-an [ إنا نحن نزلنا الذكر و إنا له لحافظون ] mataan a skami na ini turon ami so Dhikr "Qur-an" na go skami na shiyap'n ami skaniyan...

Ini phasad o Allah a kashiyapa niyan ko Qur-an, na di khabinasa na go di khalbatan na di khawmanan!

Miyakaisa na mithimotimo so mga Rido-ay o Islam ka pimomosawira-aniran i okit a kaponas o Isalm na dadn a miya tooniran a okit, sabap sa miyatharo o isa ko khawnotaniran a ( Tutunga niyo dn so Qur-an na di niyo dn maponas sabap sa miyapadalm dn ko mga Puso o mga Muslim, mimomorays iran sa lagid o kimomoraysn iran ko mga ngaran iran )!

2.) So kababaloy o Islam a Rangkom sii ko mga okitokit, mapapadalmon so langon taman, mayto mala a kawgitogit sa angkai a kawyagoyag na mapapadalm ko Islam.

Piyagosay o Islam so langon taman a okit sii ko kawyagoyag, taman ko okit a kasong sa CR na ini pamang'nda-o o Islam!

3.) So kababaloy niyan a Rangkom ko mga Darpa na go so langon o mga Tao, so kiyasugo-a o Allah ko kadaklan ko mga Nabi na siyogo siran o Allah na sii bo ko darpa iran a go pagtawiran, lagid o 'Eisa "as" ( Jesus peace be upon him ) a sii bo siyogo o Allah sii ko mga Tao sii ko Darpa iran.

Na so Nabi "saw" piyaki panulonon o Allah so Islam sa rangkom ko langowan a Tao na go langon a Darpa!

Pitharo o Allah sa Qur-an [ قل يا أيها الناس إني رسول الله إليكم جميعا ] tharo-angka hay Muhammad a hay mga Tao na siyogo ako rkano o Allah sa kalangolangon yo.

Pitharo iyan pn [ و ما أرسلناك إلا كافة للناس ] hay Muhammad na dadn a inisugo ami rka inonta bo na Langkap sii ko langon a Tao.

4.) So kababaloy o Islam a L'mbak, maana Da panobra na go da a ini ndaraynon yan a kailangan a ip'thagompiya o mga Tao.

Pitharo o Allah [ و كذلك جعلناكم أمة وسطا ] go ginayanan a skami na biyaloy ami skano a Pagtao a Lmbak ]

5.) So Allah na da a tharimaan yan a Agama a salakaw ko Islam.

Pitharo o Allah sa Qur-an [ و من يبتغ غير الإسلام دينا فلن يقبل منه ] go sa Tao a mbabanog sa Agama a salakaw ko Islam na diyon dn tharima-an.

6.) So kababaloy o Islam a tatap na go domada-it ko apiya antonaa Masa na go apiya antonaa a Darpa...

Tawfikan tano o Allah ko kinggolalan'n ko Islam...

SMBAG O SABAAD KO MGA DALIL O MGA ASHA'IRAH

SMBAG O SABAAD KO MGA DALIL O MGA ASHA'IRAH

By: Atah P. Ibrahim


Pitharo o Nabi "saw"

( اللهم أنت الظاهر فليس فوقك شيء و أنت الباطن فليس دونك شيء  )
رواه مسلم
قال العلماء منهم النويوي رحمهم الله: الباطن أي: المحيط بكل شيء؛ فبطونيته إحاطته بكل شيء

Maana: [ ya Allah na ska so maka oombaw na dadn a kaporo-an ka a nganin, go ska so masoln na dadn a lawan ka sa kasoln ] Hadith

Pitharo o mga Ulama a pdon si Nawawee rahimahumollah: aya maana a masoln "Albatin": na so kikakaipn yan ko langon taman, taman sa didalm a Doniyan na mikaka-ip yan... Na so kasoln yan na so kikaka-ipn yan ko langon taman...

Na so mga pagari tano a mga Asha'irah na aya iph'maana iran san na: "ya Allah na go skai i lbi a marani na dadn a kababa-an ka"

I say: so kon so Batin na Marani... Paganay ron anan, sokon pn so Don na Mababa... Anda anan miyapurot a basa-arab?

Malo ta paka tiwlinn: so inip'maana iranon ( so kon so Allah na Masoln a dadn a kababa-an yan )

I say: ba aya pitharo o Nabi "saw" na ( فليس تحتك شيء )? Gyanan i basa arab o dadn a kababa-an ka a nganin!

Ogaid na knaba gyanan i pitharo o Nabi "saw" ka aya pitharo iyan na gya marayag anan sa Hadith a inisurat tano a pima-anaan o mga Ulama...

Na ino phagalina o mga Asha'irah so maana a Hadith anan ka aniran midalil sa kababaloy o Allah a da a katatago-anon... Ka dakon a kaporo-an o Allah na go da a kababa-an yan! Gyanan kon i maana o Hadith...

Na katan a piyaka rayag tano a so Nabi "saw" na knaba niyan pitharo i ba so Allah na da a matatago a Shayi ko tumampar yan sa Baba!

IN'NGKA:

Maga-ayon tano man a so Allah na da a katatago-anon a Darpa a Darpa a malilibt yan so Allah, Darpa a makhikinanglan o Allah! Ka angiyas san so Allah, mas mala so Allah a diso Darpa na paka kakafir obangka tharo-a a so Allah na mapapadalm ko mappnto a Darpa a malilibt o Darpa so Allah!

Ogaid na o aya mb'thowan sa Darpa na o anda matatampar so Allah? Na adn a Darpa o Allah ka sii sa kapuro-an, sii ko Puro o 'Arsh, na knaba aya maana niyan na kailangan yan so 'Arsh na go ba malilibt o Darpa ka so Allah i lbi a mala a diso Darpa...

Di khiropa so Allah, aya rkitano a mga Ahlussunnah na pharatiyayan tano so pitharo o Allah a sifat yan na di tano ipropa! Sabap sa da niyan oto ropa-an...

Pitharo o Allah sa Qur-an [ الرحمن على العرش استوى ] so Makalimo-on "Allah" na sii ko kaporo-an o 'Arsh na miphantaw "miphapuro"... Sorato Taha, 05!

Toro-on tano o Allah ko lalan a matitho, tawfikan tano niyan sa kada o Kibr ko mga rarb tano...

و صلى الله على نبينا محمد و على آله و صحبه و سلم

SO MGA DALIL SA ISLAM A PASHODAN O MGA KOKOMAN

SO MGA DALIL SA ISLAM A PASHODAN O MGA KOKOMAN

By: Atah P. Ibrahim


1.) Qur-an "so katharo o Allah"

2.) Hadith "so katharo o Nabi "saw" go so mga galbk yan, go so miyanggalbk o mga Sahaba "ra" a kamamasaan yan na da niyan kiran saparn" giyanan i bithowan sa ( SUNNAH )

3.) Ijma' "so piyagayonayonan a kokoman o mga Ulama o Omat o Nabi "saw" sii ko oriyan o kiyapatay niyan sii ko isa a Masa", pitharo o Nabi "saw" [ di phagayonayon so Omat akn sii ko kadadagan ]

4.) Qiyas "so kisolagidn sa kokoman ko Shayi a da a miya aloy a Dalil yan sii ko Shayi a adn a miya aloy a Dalil yan sabap ko waraan odi na sipat a plagidaniran"!

Na giyanan i mga Dalil sa Islam... Na so sabaad na gophoon adn a miya ilay niyan a minggalbk ko galbk na ayniyan kinowa a Dalil, asar dn a adn a miya ilay niyan a tao a minggalbk ko galbk na tigyan mambo a khapakay ka ino bo si giraw!

Mangaday ba o koman sa Doti a Tao oto na khan mambo sa Doti kagya ino bo si giraw? Kada oto a sabot...!

Giyanan i sabap a kiyasogo-a o Allah ko Nabi "saw" a go ini toroniyanon so Qur-an ka aniyan mikokom ko mga Manosiya... Knaba aya pagilaya o Tao na sa maka aayon sa baya a ginawa niyan ka khawlog sa Naraka!!!

Na adn a mga Tao a pagosaya ngkawn so Agama na tigyan a inobo si giraw?

Digitawano anda niyanoto miyakowa a Dalil a kiph'ndaliln yan ko lagid yan a Manosiya a p'thoronan a Shaitan...!

KOKOMAN O KABATIYA SA QUR-AN A KAPLAGOLAGO

KOKOMAN O KABATIYA SA QUR-AN A KAPLAGOLAGO


AL-Muslima AL-Assila

Mga Ariya anto nai kokoman a Giya kabatiya sa Quran a kapelago... phamaka segad tasa kapiyaniya... babnara Bida'h?


Al-Farooq Al-Mowaffaq

Assalamo 'Alaikom w.w.

So raknon a kailay go miyatharo o shaikha kiya kowa-an akn sa "Sanad" sa Qur-an na Bid'ah anan sabap sao so kabatiya sa Qur-an na Simba, na wajib a mi okit ko okit a kiyabatiya o Nabi "saw" a go so mga Sahabah "ra" sa Qur-an...

Na knaba lagid anan i kabatiya iran sa Qur-an, odi ako kharibat na sii anan miya anad ko mga Egyptians...

Salakaw san pn na gya angkanan a kabatiya sa lagid anan na obatadn ph'ndirogoda na aya dn a raramigan sa ni-at o ph'mbatiya na kapagambog, kapaki-ilayn sa kapiya i sowara... Na miyada so hadap ko kabatiya sa Qur-an...

Wallahu A'lam... Oba adn a phakato-on sa Hadith a upama na so mga Sahaba "ra" na lagid anan i kabatiya iran sa Qur-an na tharo-a niyan ka anta pkhatokawi...

Aya miyato-on akn na katharo o ibn Mas'ood "ra", pitharo iyan [ di niyo ph'mbatiya-a so Qur-an sa maka sasayan sa kabatiya sa darang'n "tobathobad" ] na mararani ron a angkanan a lagidanan a kabatiya...

Pitharo o Nabi "saw" [ sa di niyan iplagolago so Qur-an na di rkami pd ] Hadith

ogaid na so mga Ulama a Qur-an, sii ko kiyapakashompasompat o "Sanad" o Qur-an na miyagayonayon siran ko okit a kiplagolagon ko Qur-an... A lagid a kiplagolagonon anan sii ko kapagimam...



Ibn Al-Islam


Masha Allah masagogod anan guro ami... Langun a mia ilayakun na miakasanad sa Qur-an na aya kabitiya iyan na datar o kapagimam

Paganayrun Amer guwaknbo Guro na kailangan na mawsayengka angkaya ptharoon na Sanad para saboten o mga taw a dirun sumasabot kagea Bayrandn pkan'g e ptharoon na Sanad.,,,,



Al-Farooq Al-Mowaffaq

Aya p'tharo-on a Sanad na so kiyapakathondotondog o kapaka popo-on o bityara... Ibarat na pitharo o Nabi "saw" a so Kapamangaroma na sunat, na miyapanothol oto i Abu horayrah ibarat, na miyapanothol pman i Polan na miyapanothol pman i Polan a miyakin'g yan ibarat sa miyamanotholon oto, taman sa mini oma ki Bukhari... Na giyanan i Sanad, na o Correct so Sanad ka palaya mga papasang a Ulama a kiya okitan o katharo na correct so tothol... Opman o adn a sakato bo a kiya-okitan yan a Bokhag na di bnar so tothol... Gyanan i Sanad na sii anan ko mga tothol... Lagid o Hadith...

Na so Sanad sa Qur-an na so kiyakin'ga o Jibreel "as" ko Qur-an sii ko Allah, na miyakin'g pman o Nabi "saw" ko Jebreel "as" na miyakin'g pman o mga Sahaba "ra" ko Nabi "saw" na miyakin'g pman o mga Tabi'een ko mga Sahaba "ra" taman sa miyakawma ko masa imanto... Gyanan i Sanada...

Na sa miyaka kowa sa Sanad na aya maana niyan na mikaka-ip yan so okit a kiyabatiya-a ko Qur-an... So okit a kiyabatiya-a ron o Nabi "saw" sa dadn a bawn ribat... ( sii ko kaph'mbalsa ron )...

Na Alhamdulillah ka giya Sanad a mini oma ko pagari niyo na ika 21 ipoon ko Nabi "saw"...

Aya okit a kakowa sa Sanad na mbatiyaan ka so Qur-an sa knabangka phagilayn ipoon sa Fatiha taman sa Sorato Nas sii ko Shaikh a maka kokowa sa Sanad na khoriksiyonan ka niyan na o adn a dingkawn khasowa na dika phakakowa sa Sanad... Na lagidoto dn i kapaka thotondotondog yan taman ko Nabi "saw"...

KAPAKI SAMBI SA KAPAMANGNDA-O

KAPAKI SAMBI SA KAPAMANGNDA-O



Harema Bunso


Salam. Kaka pakaiza, ibarat na adna teacher a adna item iyan. Dimamangdao sa mawatan a ingd oman mpita, na kgya mwatan na by0kl iyn so kapagal0yan. Aya siwa iyan na kumin0wa sa salakaw a dinyan d pakapamangda0n sa knaba lalay0n pz0ng sa sch0ol. 0man z0kaya na mga 15,000p ata suweldo nya na aya ipmbgay nyan sangk0t0wa d nyan d pakamangda0n na 4,000p. Kaka, an2nay hukuman eni?





Al-Farooq Al-Mowaffaq



Alaikomossalam w.w.



Na apiya Kafir so Government sa Pinas na Haram oba pamagakali odi na traydora so Kafir, apiya so mismo dn a Tao a tiraydor ka niyan na Haram obangka traydora, pitharo o Nabi "saw" [ لا تخن من خانك ] dingka thraydora so tomiraydor rka... Hadith



salakaw san pn na sii ko bo anan miyan'g sa skitano ron ini a mga Moro na katokawaniran na aya pman a resulta na ( So mga MORO na mga Bokhag )!



Aya pontosan yan na di anan khapakay na so khigalbkon na kailangan a maka thawbat, p'khowa sa sokay a da niyan manggalbk so galbk yan! Madakl a Dalil anan sa kiya Haram yan... Na odi thawbat na samanan na uman komobra na HARAM na katawan tano so balas o kakan sa Haram...

KOKOMAN O KASHATOR

KOKOMAN O KASHATOR




So ka shator na Haram, piyaka Haram o kadaklan ko mga Ulama

ثبت عن علي رضي الله عنه (أنه مر بقوم يلعبون الشطرنج ,فقال : ماهذه التماثيل التي أنتم لها عاكفون؟ وقلب الرقعة عليهم)

Miya olawla a so 'Ali "ra" na siyagadan yan a mga Tao a dii shasator na tigyan a antonaa mga Barahala ini a lilibtn yo? na kilid yan kiran so Papana o Satoran!

Go sabap sa pkhasabapan sa kap'khapadalm o rata a ginawa sii ko sabaad...
Go pkhabinasa niyan so Oras!

Gyanan igira a da a anggan yan!

Na amayy ka adn a anggan yan na mas lbi a kiya Haram yan ka miya pd ko kandarmt a inisapar o Allah!

Pitharo o Allah sa Qur-an [ إنما الخمر و الميسر و الأنصاب و الأزلام رجس من عمل الشيطان ] Almma-idah 90

Mataan a so pakabrg a go so kandarmt a go so kaprimar na marshik a galbk a Shaitan!

Ini sapar pn o Imam Ahmad a go so Imam Abu Hanifah rahimahomaLLah so kasalama ko pasator sabap sa skaniyan na Baradosa...

Pontosan anan o katharo i Shaikhol Islam ibn Taymiyyah makapantag ko Satoran.

KOKOMAN O MGA GRADUATION SA MADRASAH

KOKOMAN O MGA GRADUATION SA MADRASAH GO SO DII PMORAYSAN SA QUR-AN:


So sabaad ko mga Ulama na kiyokomiran anan sa Bid'ah, sabap sa giyanan ko na mikakampt ko Agama na da anan manggalbk o Nabi "saw" a go so mga Salaf "ra"...



So pman so sabagi ko mga Ulama na piyakay iran anan, sabap sa knaba anan pd ko Agama ka matag anan pangoyat ko wata a dii maganad ko Agama sa oba kalokalo na maka panagontaman siran, go pangoyat ko mga wata a da paganad sa oba siran maka paganad...



Bali matag anan "Waseelah o Da'wah" maana: pd sa okit a kisampay o Agama...



Na kha-in'ngka tano sa angkanan a dowa a tindg a miyakandayaga a angkai a kha-aloy:



* Gyanan na depindi ko Ni-at, upama ka so Tao a dii thandingan ko ndalagidanan a kalilimod na aya ni-at yanon na pd dn anan ko Agama a ip'sho-aso-at yan ko Allah na aya Kokoman yan na BID'AH!



* Upama pman ka aya ni-at yanon na matag bo pangoyat ko mga Wata go so mga loks o mga wata na knaba BID'AH ka mbalasanon pn so Tao sabap ko panagontaman yan ko kap'khapaganada ko Agama, a giyanan i tindg i Shaikh ibn Al-'Othaymeen rahimahullah a go so mga pd yan...



Pitharo i Shaikh ibn Al-'Othaymeen rahimahullah:



[ Knaba anan pd sa Bid'ah sabap sa matag anan pangoyat ko mga Wata a p'phamaganad ko Agama "Qur-an a go pangoyat ko mga loks iran na go so salakaw kiran, na miyapd ko okit a kanda'wah na mbalasanon so Tao...



Go mapapadalm san so pithibarangan a kamapiya-an, lagid o:



1.) Kap'khapiya a ginawa o mga wata a miyamaganad ko Agama odi na mimorays sa Qur-an.

2.) P'kha-oyatan siran ko dii kapaganada ko Agama.

3.) P'khamasa-an sa angkanan a kalilimod so dii kash'las'la-a ko Agama.

4.) Diiron maka thatalaboka so mga Muslim sa kapipiya a ginawa.

5.) Diiron mapamagosay so saba-ad ko Agama a kailangan a p'khatokawan o mga Muslim.

6.) Diiron mapamagosay so kalbihan o Qur-an "Agama"... Etc... ]!!!



I say: so pman so p'kha adnon a mga karibatan lagid o dii kapaka sh'mbor o Mama a go so Bae na salakaw a istorya roo, mala oto a Dosa a kailangan a ma-in'ngka...



Go so saba-ad a mga Madrasa na phagosar sa mga Toga ago so mga nganin san a sii miya anad ko mga Kafir na kailangan a kapananggila-an ka di Mapiya! Mala a karibatan...



Wallahu A'lam...

KOKOMAN O KATINDGI KO KIPOROON KO FLAG

IFTA A LOJNAH DA-IMAH SA SAUDI MAKA PANTAG KO KA TINDG PARA KO FLAG




Fatwa # [ 2123 ]



Q. Ino ba khapakay so katindg sa slasla sii ko apiya antonaa dn a Flag a Country odi na Ingd?



A. Di khhapakay ko Muslim so katindg sa slasla iyan ko apiya antonaa a Flag, ka gyoto miyakaratarata a Bid'ah! a da kamasa-i ko masa o Rasolollah "saw" go da kamasa-i sii ko masa o pat a Kholafa "ra" go phaka binasa anan ko kakokompleto o Tawheed a Wajib "so kapaka isaisa a ko Allah", go phaka binasa pn anan ko titho a kash'lasla-a ko Allah sa skaniyan bo, go khasabapan anan sa kapanakuto, go mapapadalmon pn so kasayani ko mga Kafir, go so kap'showaa ko mga adat iran a mga rrshik, go pkhasolagidan siran pn ko diiran kapanobra sii ko dii kash'laslaa ko mga Datu iran go mga pakaradiya-aniran, na giyanan na palayya dn anan ini sapar o Nabi "saw"





Fatawa Lojjnah Da-imah [1/235]





NOTE:



Gya angkanan a Ifta na mararangkom yan so apiya antonaa dn a Flag! adn a idaida-on sa Da... na rangkom anan.. apiyya Flag a Saudi...







فتوى رقم (2123)



هل يجوز الوقوف تعظيما لأي سلام وطني أو علم وطني ؟





الجواب :

لا يجوز للمسلم القيام إعظاما لأي علم وطني أو سلام وطني بل هو من البدع المنكرة التي لم تكن في عهد رسول الله صلى الله عليه وسلم ، ولا في عهد خلفائه الراشدين رضي الله عنهم ، وهي منافية لكمال التوحيد الواجب ، وإخلاص التعظيم لله وحده ، وذريعة إلى الشرك ، وفيها مشابهة للكفار وتقليد لهم في عاداتهم القبيحة ومجاراة لهم في غلوهم في رؤوسائهم ومراسيمهم ، وقد نهى النبي صلى الله عليه وسلم عن مشابهتهم أو التشبه بهم وبالله التوفيق .





"فتاوى اللجنة الدائمة" (1/235)