KAMBILANGATAO KO KA ISHA SA KOKOMAN BY: ABU KAWTHAR‎

KAMBILANGATAO KO KA ISHA SA KOKOMAN BY: ABU KAWTHAR‎

( أدب المفتي والمستفتي )

SO PAPARANGAYAN A KABILANGATAW SII KO MAGIZA SA KOKOMAN GOSO 

PAGADOWAN SA KOKOMAN

===================================================

SO PAPARANGAYAN A KABILANGATAW O MAGIZA SA KOKOMAN:

1. So kapagadati go kapanalimbabaan sii ko pagadowan ka sa kokoman [Ulama] sa pananggila ingka obangka mitotoro a tindoro oka sa parasiyan, go bangkaon mattaro so lagidaya a kattaro: antonay kpit ka??? Mazhab ka??? Knaba giyanani I pittaro o manga salakaw a ulama!!!, goso salakaw san a dimapiyai sagad a kattaro.

2. So kaploba angka ko kasasarigan so sabotiyan ko ipagiza aka,knaba asar ka miya ttaro a miyaka paganad na odi na miyaka pamatiya na ini pangkatekaden ko pangkatan o manga Ulama.

3. Obangka izai so [Ulama] ko masa a di ppipiya a ginawa niyan,lagid igira a maka aawida akaliyan,pekkararangitan,go makagegedam sa paniyakit o lawas, goso salakaw san a kkapakay a maka ongen ko kapiyao kapamimikiran.

4. So kapaka onaa niyan ko mapiya a kattaro ko daniyampen kapaka iza, ibart na so kattaro angka: Aleem balasangka o Allah, odi na shaykh tawfikangka o Allah,miyasoat so Allah ko mbala a lokska, goso salakaw san a ipakapiya ginawa o Ulama, na gongkabo izaan so ipagiza aka.

5. Amay ka so ini iza iyan a kokoman na katitindegan a kattaro o manga ulama, na aya pilianiyan naso tindeg a aya ilayaniyanon mas malai sabot nago marani ko sigorado, nago aya taralbi na sa mabager ko dowa dalil na aya niyan pilia.

6. Di mapiya o ba ayangkabo sanai naso kokoman o sa katao,badi labaw amay ka dika ttatakna ko kokomaniyan,sa adoka sa isa, dowa ,telo taman sa misampay ka ko kattatakna o pamikiran ka.

7. Ayaden a mapiya na dingka panarisarigen so ipagadongka, sa skaden I izaon nago panamaringka I siingka mi iza ko kiya patotanon, opeman odika mapaparo na miya pakay a mloba ka sa zariganeka ko pakaiza aka.

SO PPARAYNGAYN O "ULAMA" A PAGADOWAN SA KOKOMAN:

1. So kaadnon o linang a ikhlas, sa ayabo a antapiyan na tonton ko balas o Allah, sa da a matago ko puso iyan a oba mabantog o manga tao. Miya aloy o isa a kiyadayoan a ulama a si I ibn al-Munkadir:[mataan a so ulama na matatago sa pagelelatan o Allah goso manga tao, na ilaya niyan piyapiya so okit a khipepentagniyan kiran].

2. Maadnon so kalek ko Allah ko kokkomeniyan, sa maadnon pen so sangat a pananggila sa ba maka kokom sa soranga o ontol, go da a maadnon a kawan nago pangandam sa kappayaga niyan ko ontol a kokoman, go pikira niyan a diden mattay magaan na ppangadap ko Allah na ipagizaon so nganin a inokasa niyan sa kokoman. Inikalimo o Allah so imam Malik sa kiya ttaro aniyanon sa:[sa tao a sembag sa kokoman na daa niyan a pamimikirana so SORGA goso NARAKA go andamanayai kapaka lidasiyan ko somariya sa AKHIRAT na gobo sembag sa kokoman].

3. Diniyan mbaloya a mamis sa ginawa niyan so kaokas sa kokoman, sa owana ppalogoya niyanon na aya mapiya, inontabo oba kanget ka maotopen ka zarakan ko Allah nago pangniron sa tabang sa mitonay sa ontol. So Abdur Rahmaan ibn Abi Layla "Rahimahollah" na pittarp iyan:[ mataan a riyaotaken so 120 a ped ko manga ANSAR a ped ko manga SAHABA o RASULULLAH "sallallaho alayhi wasallam" na igira a inizaan so isa kiran sa pakaiza na sii niyan paki sembag ko isa a SAHABA]

4. So kalalayama niyan ko ginawa niyan ko kattaro a "DIKO KATAWAN" sii ko pakaiza a diniyan katawan, go pananggilai niyan so kakokoma niyan ko nganin a di niyan katawan.

5. So kapananggilai niyan ko kaplemolemowa ko kokoman, sabap sa aya kokoman na gopoon matanto so tao odi na "Ulama" a diniyan pemolemon so kokoman na miya haramon so kapangokom, sa ped sa tanda a dingkA pleboleboden so kokoman na dingka ppariksaan piyapiya, go tonganay a madilapeti ka kokom, salakaw peman igira a andangkaden a kaip so kokoman ka daden a sangkaan ko kadilapetiyan. Pittaro o isa ko manga ala a TABIEN a si Abi al-Hussain Uthman bin Aasim "Rahimahollah" :[mataan a so isa rkano na madilapet I kakokom sii ko kokoman, inangin na o sii ayanan miiza ko Omar ibn al-Kathab na timoo niyan daan so "AHLUL BADR" langowa miyaka darpa ko kiya tidawa sa BADR ka odasaniyan siran nago niyambo sembaga].

6. So kapakawati niyan ko kabetad sa kokoman sa basii maroran ko manga limpangan a piyaka haram, nago miya pakay a pakasisingay, goso kikokomen ko di kaoopapakatan a kokoman go malobay a tindeg sii ko manag FOQAHA .

7. So diniyan kappagalangalanga ko kokoman, sa ba ayabo I isebagiyan ibarat na: giyangkanan a mas'ala na aden a kiyasopasopakiron, odi na miya dowa san ka kpit so manga ulama, odi na tiyabisiyan so tindeg o sa katao ko manga imam apiyapen malobay, sabap sa aya antap o dii mangingiza na so katokawi niyan ko kokoman a diron kadawayan, sa miya patot ko Ulama a kapanamari niyan sa aya mikokomiyan na so mabager a tindeg, na amay ka diniyan katawan na ttangen "tareg" sa taman sa diron maka rayag.

8. So kapaka kampeta niyan ko osayan ko ikkokomiyan sa diyangka a ssaboten o dii mangingiza, sa da awida akal ko kapagaloya niyan ko manga dalil a imbageriyan ko kokomaniyan amay ka marayag a dalil sa diyangka di matas.

 والله تعالى أعلم