SO FIRQAH A PAKALIDAS [ الفرقة الناجية ] BY: ABU KAWTHAR

SO FIRQAH A PAKALIDAS [ الفرقة الناجية ] BY: ABU KAWTHAR

PAMKASAN

الحمد لله رب العالمين و الصلاة و السلام على رسول الله وعلى آله وصحبه أجمعين...وبعد

So oriyano podi ko Allah agoso salawat ko Rasolollah agoso mga pamiliya niyan agoso mga sahaba niyan sa kasama-sama iran. Oriyanoto:

So manosia na ayadna mala a antap iyan na andamanaya i kapakaslang iyan sa mapiya ka an thagodaya ko donya na sampay sa akhirat. Apiya so mga baradosa agoso mga kafir na palaya ondn makasisinganin na ayapn so miyamaratiyaya. Ago giyanan mambo i kabaya rkitano o Allah a miyadn rkitano a biyaloy tano niyan a kalipa ko liyaw lopa na siyogo iyan rkitano so tindos ko mga sogo iyan a so Muhammad [Sallallaho Alaihi Wa Sallam] ago initoron iyan rkitano so tindos ko mga kitab iyan a so Qur’an.

Ogaid na aya ropaano manosia na pkhalipatan iyan a ayabo a kapakaslang iyan sa mapiya a kapthagodaya iyan ko donya ago sa akhirat na so kakdga niyan ko ontol a titho a bnar sa lagido kinigorisnon o Rasolollah [Sallallaho Alaihi Wa Sallam]:

عن إبن مسعود رضى الله عنه قال: خط لنا رسول الله صلى الله عليه و سلم خطا بيده ثم قال: هذا سبيل الله مستقيما. وخط خطوطا عن يمينه وشماله، ثم قال: هذه السبل، ليس منه سبيل إلا عليه شيطان يدعو إليه، ثم قرأ قوله تعالى: [وإن هذا صراطى مستقيما فاتبعوه، ولاتتبعوا السبل فتفرق بكم عن سبيله، ذلكم وصاكم به لعلكم تتقون]. (الأنعام:153). حديث صحيح رواه أحمد والنسائى

“Phoona thotol ko ibn Masoud [Radhi Allaho Anho] a pitharo iyan: “gomiyoris so Rasolollah[sallallaho Alaihi Wa Sallam] sa goris a giyadna lima niyan oriyan iyan na pitharo iyan, ‘giyai lalano Allah a matitho’, na go gomiyoris sa mga goris sa kawanan agosa diyowang oriyan iyan na pitharo iyan, ‘giyai mga lalan a dadna baon lalan inonta a ba daa shaytanon a ipphangimbitar iyan’, oriyan iyan na tiyontol iyan so katharo o Allaho Ta-ala (a pd sa maana niyan), ‘ago mataan a giyai lalan akn a matitho na kdga niyo ago oba niyo kdga so mga lalan ka khablag kano niyan phoon ko lalan iyan (Allah), giyanani iniwasiyat iyan rkano ka kalo-kalo oba kano malk sa titho a kalk (ko Allah)’.” [6:153]. Hadith Sahih a piyanotolo Ahmad agoso An Nisai.

Knao ba roo bo taman ka miya-aloy pn o Rasolollah [Sallallaho Alaihi Wa Sallam] ko mga Sahaba niyan[Radhi Allaho Anhom] a sadn sa romaut kiran ko khauri a masa na khaylay niyan dn so kakha-oparik o omat iyan sa lawan pn ko kiya-oparik o miyanga oonaan a mga pagtaw a piyamanoronan sa kitab sa kiyatharo a niyanon:

(ألا وإن من قبلكم من أهل الكتاب افترقوا على ثنتين وسبعون ملة وإن هذه الملة ستفترق على ثلاث وسبعون: ثنتان وسبعون فى النار وواحدة فى الجنة، وهي الجماعة). رواه أحمد وغيره وحسنه الحافظ. وفى الرواية: كلهم فى النار إلا ملة واحدة ما أنا عليه وأصحابى)). رواه الترمذى وحسنه الألبانى فى صحيح الجامع.

“Ba di mataan a so miyanga-oonaan niyo a pd ko piyamanoronan sa kitab na miya-oparik siran sa pitopolo ago dowa ka millah (lompokan) ago mataan a giyangkai a millah(lompokan o mga Muslim) na kha-oparik sa pitopolo ago tlo na: so pitopolo on ago dowa na khatago ko naraka ago isabo a pakasoldon ko sorga a giyanan so aljamaa”. Piyanotol o Imam Ahmad agoso mga salakaw ron a piyaka-hasan o Al-Hafidh. Ago siiko pd a riwayah na: “langon siran dn khatago ko naraka inontabo so isa a millah (lompokan) a giyanan so nganin a katatagoan rakn agoso mga sahaba kn”. Piyanotolo At-Thirmidhi a piyaka-hasan o Al-Albani sii ko Sahihol Jamie.

Sabap roo na aya khabaloya dalm a giyangkai a makampt a osayan na:

1. Antawaa so siranoto a satiman a Firqah/Millah a siyalbo o Nabi [Sallallaho Alaihi Wa Sallam] a pakalidas ko naraka jahannam?
2. Ino pagingarani so Ahlus Sunnah Wal Jamaa sa Ahlus Sunnah Wal Jama-a?
3. Antona-ay mga manhaj o Ahlus Sunnah Wal Jama-a?
4. Antonai mga tanda o Ahlus Sunnah Wal Jamaa.
5. So insana o Nabi [sallallaho Alaihi Wa Sallam] a kilidas ko naraka jahannam.

ANTAWAA SO SIRANOTO A FIRQAH A SIYALBO O NABI [SALLALLAHO ALAIHI WA SALLAM] APAKALIDAS KO NARAKA JAHANNAM?

Siran so mga taw a kkpitan iran sa tarotop so pikpitano Nabi [Sallallaho Alaihi Wa Sallam] agoso mga sahaba niyan [Radhi Allaho Anhom] a giyanan so Firqah a phagingaranan sa Ahlus Sunnah Wal Jamaaa pd a ipmbto kiran so Ahlul Hadith odi na (الطائفة المنصورة) At-Taaifa Al-Mansourah.

INO SIRAN PAGINGARANI SA AHLUS SUNNAH WAL JAMAA?

1. Iningaranan siran sa Ahlus Sunnah Wal Jamaa sabap ko katitindgiran agoso kakkdga iran ko Sunnah (mga okit-okit ago mga ndaowan) o Nabi [Sallallaho Alaihi Wa Sallam] ka isosongkad iranon so langowan taman iran ago iphapasod iranon so kaogit-ogit iran sa tarotop. Giyoto pn i sabap a kapmbtowi kiran sa Ahlul Hadith ago At-Taaifah Al-Mansourah.
2. Iningaranan siran pn sa Al-Jamaa ka sabap ko kiyatimo-timo iran siiko Aqeedah a ontol a bnar ago da siran mbla-blag ko titho a kpit o agama Islam. Matitimo-timo siran ko mga Imam (a miya managontaman ko toruana ontol) ago da siranon mblag. Ago aya kkdgn iran a kpit na so okito-kito mga Salaf (iphoon ko Nabi ago so mga Sahaba na taman dn ko mga Tabiin agoso mga Imam miya managontaman ko toruana ontol ko sold o miyakatlo ka century a giyoto so miyatindos a masa o Islam). Na sadn sa taw a kkpit ko kpit iran na pd a ipmbto ron mambo so Salafi.

ANTONAAY MANHAJ O AHLUS SUNNAH WAL JAMAA?

1. Paganay ron na pagi-iltizaman iran odi na totomangkdan iran so manhaj o Rasolollah [Sallallaho Alaihi Wa Sallam] ko kauyag-oyag iyan pn agoso manhaj o mga Sahaba niyan [Radhi Allaho Anhom]sa kasama-sama iran ko oriyano kiyawafat iyan, a giyanan so Qur’an a initorono Allah ko siyogo Iyan na inindao niyan ko mga Sahaba niyan sa minggolalaln ko mga Hadith iyan ago inisogo iyan ko mga Muslim a kathagonanay ranon sa kiyatharo a niyanon:

(تركت فيكم شيئين لن تضلوا بعدهما: كتاب الله وسنتى...)

“inibagak akn rkano so dowa a shay a (o kapti niyo na) di kanodn madhadag: So kitabo Allah agoso Sunnah kn…” [Sahih Al Jamie a siyahih I Al-Albani].

1. Phagndod siran ko Qur’an ago Hadith igira a adna di iran phagayonayonan sang-golalan ko kiyatharo awno Allah [Subhanaho Wa Taala] sa Qur’an:

    (فإن تنازعتم فى شيء فردوه إلى الله والرسول إن كنتم تؤمنون بالله واليوم الآخر،

     ذلك خير وأحسن تأويلا). [النساء:59]

  “Na igira a miyakasosopaka kano ko shay na ndodn niyo ko Allah agoso sogo amay ka skano na paparatiyayaan niyo so Allah agoso alongan a mauri, ka giyotowi mapiya ago matanos a bobolos.” [4:59]. 

1. Di iran phakilawanan so katharo o Allah agoso siyogo iyan ko apiya antawaa ago apiya antonaa katharo sabap sa kiyatharo awno Allah:

(يا أيها الذين آمنوا لا تقدموا بين يدي الله ورسوله، واتقوا الله إن الله سميع عليم) الحجرات:1

“Hay skano a miyamaratiyaya na di niyo phagonai so Allah agoso siyogo iyan, ago kalkn niyo so Allah, mataana so Allah na lbiya pakan’g ago lbia matao.” [49:1]

1. Aya tindg iran na pakapng-golalann so Tawhid (so kapakaisa-isa a ko Allah sa dadna sakotowa iyana shay siiko simba agoso kapangangarongan agoso kanduwaa ko masa a kangt ago kapakadaya….) a giyanani unayan a pphasodan sa kapakatindga ko dawlah islamiyah. So kitaplkn ko mga shirk (kapanakoto) a matatago ko mga ingd a Muslim na pdanan ko kapakapng-golalan oTawhid, ka didn makadhaag so ompongan a indadaraynon iran so Tawhid ago di iran ithaplk so pimbarang a kapanakoto a songgiring ko mga Rasol [Alaihimos Salam] aya mala na so Rasolollah[Sallallaho Alaihi Wa Sallam].
2. Phagoyagn iran so Sunnah o Rasolollah [Sallallaho Alaihi Wa Sallam] siiko mga simba iran agoso mga paparangayan iran agoso langowana okit a kapphagintaw iran. Giyotowi sabap a pkisangi siran ko pagtaw iran na ppaka-iring siran ko mananagga a misasaug ko paglt-ltano pd iran a pagtaw. Giyotowi kiyatharo awno Rasolollah [Sallallaho Alaihi Wa Sallam]:

(إن الإسلام بدأ غريبا وسيعود غريبا كما بدأ، فطوبى للغرباىء). رواه المسلم

“Mataana so Islam na miyanagipoon a mananangga na magndod bo a mananangga sa izano kiyapanagipoon iyan, na miyagontong so mga mananangga.” [Sahih Muslim]. Siiko isa a kiya aloyaun na “Miyagontong so mga mananangga; siran so pphangompiya igira a mimbinasa so pagtaw.” [Abo-Amro Ad-Dani].

1. Daa ba  iran ptindgi a katharo odi na kpit inontabo so katharo o Allah [Subhanaho Wa Taala] agoso katharo o Rasolollah [Sallallaho Alaihi Wa Sallam] a skaniyan so piyarihala o Allah phoon ko mga karibatan ago knao ba pphangantang ago pphangambar sa katharo ka aya mataan na minggolalan sa wahi a phoon ko Allah. Makaliyo-liyo ko Rasolollah [Sallallaho Alaihi Wa Sallam] sa kiyaparihala awn o Allah phoon ko karibatan na so mga manosia na aya ropaan iran na miyakatok-tokron so karibat apiya dni kapananggila niyan ago kambilangataw niyan ago kala iyani sowa ago sabot. Pitharo o Rasolollah [Sallallaho Alaihi Wa Sallam].

(كل بني آدم خطاء، وخير الخطائين التوابون). حسن رواه أحمد

“Langowano mbawataano Adam na pkharibat, ago aya mapiya ko pphangariribat na so kathaubat”. [Mapiya a Hadith a piyanotol o Ahmad].

1. Siran so mga taw a Ahlul Hadith (isosongkad iran so langowan taman iran ko mga Hadith) sa kiyatharo awno Rasolollah [Sallallaho Alaihi Wa Sallam]:

(لا تزال طائفة من أمتى ظاهرين على الحق، لا يضرهم من خذلهم حتى يأتي أمر الله). رواه مسلم

“Tatap dn a adn ko mga omat akn so ipapayag iran so bnar, di kiran pakabinasa so taw a pphagito-itoon iyan siran sa taman dn sa mitalmba so sogoano Allah.” [Sahih Muslim]. 

1. Pagaadatan iran so mga imam a miroromasay managontaman (ibarato pat a imam), knao ba adna ppntoon iranon a isabo a giiran tha-asoban a ip-phamangkol a ayabo bnar so kpit iyan ka sii ran gii pasodn so mga kokoman ko Qur’an agoso Hadith ago so mga katharo o mga Imam amay ka maka-aayon ko Qur’an ago Hadith a mabagr na palaya iran dn phagonotan ka kagiya giyoto mambo so ini-insarato mga imam a kaunoti kiran amay ka so katharo iran na maka-aayon ko Qur’an ago Hadith na oba khatoon a pakaliliyo ron so rkiran na thalikodan ago di pagonotan.
2. Ipsogo iran so mapiya ago ipzapar iran so marata. Phagongkirn iran so mga Bid’ah agoso langowana inimbabago ko agama Islam a di ron pd agoso mga ompongan a aya galbk iran na phagoparikn iran so pagtaw ago gii mbabago sa mga kpit iyan a salakaw ko Sunnah o Rasolollah[Sallallaho Alaihi Wa Sallam] agoso mga Sahaba niyan [Radhi Allaho Anhom].
3. Ipphanolon iran ko mga Muslim a kakpitiran ko Sunnah o Rasollollah [Sallallaho Alaihi Wa Sallam]agoso mga Sahaba niyan ka an siran makadhaag ago an siran makasold ko sorga sabap ko limo o Allah agoso sapaato Rasolollah [Sallallaho Alaihi Wa Sallam] amay ko iidin rkaniyano Allah a kaphanapaat iyan sa alongana mauri.
4. Phagongkirn iran so mga kitaban/kokoman a pasado manosia a di maka-aayon ko mga kokomano Islam. Ipphanolon iran so kipphangokomn ko Kitab o Allah a initoron iyan ka an maparoli o manosia so kathagodaya sa donya na sampay sa akhirat ka kagiya so Allah na skaniyai lbia a matao ko kamapiyaano mga kaadn iyan na so kokoman iyan a tatap na domadait ko apiya anda a darpa ago apiya antonaa masa. Ka ino masasansara so kapphagintaw pagtaw siiko apiya anda a ingd lalambo na so phagingdan o mga Muslim ka kagiya tiyalikodan iran so kokomano Allah agoso okitokito Rasolollah [Sallallaho Alaihi Wa Sallam]. Ago san pn sabap a kapakandha-damar ago kapakadadampanas o mga Muslim sa imantowa masa. Sabnara didn makandod so bantogan o mga Muslim taman sa di mbalingan so pithanggisaan ago so mga ompongan agoso mga parinta siiko titho-titho andaowan/turoano o Islam sa kiyatharo awno Allah:

(إن الله لا يغير ما بقوم حتى يغيروا ما بأنفسهم). [الرعد:11]

“Mataana so Allah na di niyan pagalinn so nganin a btado pagtaw taman sa di iran alinn so nganin a btado mga ginawa iran.” [13:11].

1. Ipphanolon iran ko mga Muslim sa kalango-langon iran so kaprang sa lalan ko Allah ka kagiya a paliyogat ko omani Muslim sanggolalan ko diyangka a kakhaghagaa iranon sa kiphapasod iyan sangkai a phanga-aloy:

•  
  1. So kaprang sa lalan ko Allah sang golalan ko katharo ago pansom – iphanolon ko Muslim agoso di-muslim so kakpitiran ko titho-titho a Islam agoso kinggolalann iran ko Tawhid ka an mitaplk so kipphanakoton ko Allah; a apiya sii ko mga ingd a Muslim na madakl a matatagoon. Miya-aloyo Rasolollah [Sallallaho Alaihi Wa Sallam] a kaphanakoto o mga Muslim:

•  
  (لا تقوم الساعة حتى تلحق من أمتى بالمشركين،

•  
  و حتى تعبد قبائل من أمتى الأوثان). صحيح ومعناه فى مسلم

•  
  •  
    “Didn makatindg so bangkit sa taman sa tondogno o pitikaloksan a pd ko omat akn so mga Mushrik, ago taman sa simbaano pitikaloksan a pd ko omat akn so mga barahala.” [Sahih a piyanotolo Abo-Dawood ago Muslim].

•  
  1. So kaprang sang golalan ko tamok – pnggaston siiko kip phanolonn ko Islam agoso kipsoratn ko mga kitab para ko Islam. Pnggaston pn para sa gii kapaka-khakaraniyaa ko mga poso o miyamaratiyaya ago para ko mga Muslim a manga lolobay ron so paratiyaya ka ansiran makathatakna ko Islam.
  2. So kapranga ko ginawa odi na kiprangn ko ginawa sa kapakadhaag o Islam agoso mga Muslim ka an pangondaya so kabaya o Allah ka an kalangkolobi o Islam so mga ridoay niyan na makandatomanong so Islam. Pitharo o Rasolollah [Sallallaho Alaihi Wa Sallam]:

•  
  (جاهدوا المشركين بأموالكم وأنفسكم وألسنتكم). [أبو داوود].

     “Pranga niyo so mga mushrik sanggolalan ko mga tamok iyo agoso mga ginawa niyo agoso mga katharo iyo.” [Abo-Dawood].  




 

SO KOKOMANO KAPRANG SA LALAN KO ALLAH NA DOWA:

1. FARDHO AIN – maana paliyogat ko langowana Muslim igira a so ridoay o Islam na siyoldan iyan so ingd a Muslim ibarat a Palestine a siyoldan o manga Yahodi a mga salimbot na so Muslim a adna kighaga niyanon odi na adna kakhaparo niyan mlagido tamok odi na lawas na madodosa siran taman sa diron makaliyo so mga Yahodi a makambalingan a Masjid Al-Aqsa ko mga Muslim.
2. FARDHO KIFAYAH – maana igira a ininggolalan o sabaad ko mga Muslim na knao ba paliyogat ko sabaad. Inonta na ondharaynonn iran na palaya siranon miyadosa. Giyai so kipphanolonn ko Islam ko langowana ingd ka anon mindato so kabaya o Allah na mitaplk so kipphanakotonon ko Allah na sadn sa taw a phagalangan iyan so Da'wah na prangn sa taman sa mada so phagrnon odi na so phagalangon.

SO PAGANAY A KA ADNO MGA KPT A BID’AH:

Giyangkai a bandingan na knao ba sii pd ogaid na pagalowin tano sii sa makampt so pantag ko mga kpit a pimbabago ko Islam ka an igira a miyaknal o taw na kapphananggilaan iyan siran agoso mga kpit iran. Pitharo i Shiekh Al-Islam/ Ibn Taymiyah [Rahimahollah] a lomitaw so manga kpit a manga Bid'ah siiko polimposan o masa a kapakandadato o moripori ko manga Khalafa Ar-Rashidin sa lagid dn o kiyapanotolawn o Nabi [Sallallaho Alaihi Wa Sallam] ko mga sahaba niyan a sadn sa makaphagintaw kiran sa mathay na khamasaan iyan so ka khaadno kapsosopaka sa mala ago madakl. Aya paganay a lomtaw na so Al-Qadariyah agoso Al-Arjaiyah agoso Shiah agoso Al-Khawarij; sii oto ko ikadowa ka gatosan ragon (century) a adn pn a oyagoyag ko manga sahaba [Radhi Allaho Anhom] na inongkir iran oto agoso mga taw a minggalbkon.

Oriyan iyan na lomitaw pman so Al-I'tizal ago miyaadn so fitnah ko pagltltano mga Muslim na lomitaw dn so kiyapakasopa-sopaka o mga pamikiran agoso kapramig o mga taw ko ribat a kpit agoso kaphagonotiran ko baya o mga ginawa iran. Lomitaw pn so lompokan o Sufi agoso Quboriyah, siiyoto ko oriyano kiya iposo miyaka tlo ka (century) gatosan ragon a giyoto so daa lagid iyan a mapiya a masa o Islam. Sa giyotodn i masosowa iyan a sadn sa kapkiisgo masa na pkhawmanandn so kapkhaadno mga lompokan a dhadhag na taman dn sa kaplaghadayo masa na ppakadakl dn.

SO MGA SABAP A KAPKHA ADNO RIBAT A KPIT:

1. So kada a sabot ko titho a mga kokoman o Islam. Oman dn misg so masa na maawat so pagtaw ko rarado minitalingoma o Rasolollah [Sallallaho Alaihi Wa Sallam] na kabhabasan so sabot na makalabaw so kadaa plng ko Islam. Pitharo o Rasolollah [Sallallaho Alaihi Wa Sallam]:

   (إن الله لا يقبض العلم إنتزاعا ينتزعه من العباد ولكن يقبض العلم بقبض العلماء حتي إذا لم يبق عالما إتخذ الناس رؤساء جهالا فسئلوا فأفتوا بغير علم فضلوا وأضلوا). [جامع بيان العلم وفضله لإبن عبد البر] –

  "Mataana so Allah na di niyan ghamakn so elmo sa ba niyan ghansinga ko mga oripn (Iyan) ogaid na khowaan Iyan sa pnggolalan sa kakhowaa niyan ko mga Ulama sa taman sa amay ka dadna lamba a ulama na khowaano mga taw (a ulama iran) so manga olowan a daa manga plng iyan (ko agama) na izaan siran na iptaan iran sa sa daa baon elmo na miyadhadhag siran ago miyakadhadhag siran." [Jamee' Bayan El-Elm].

   So mga Ulama agoso Elmo i ppakabolong ago ppakarn sa di kakhadhadhag o oripn na o mada so mga Ulama agoso elmo sa lagido giiron kasinaghadi sangkai a masa na miyakalbod a kapkha adn odi na kappakatindg agoso kaprarad o mga kpit a pakadhadhag.

1. So kaunoti ko baya a ginawa a giyanan i lalayon ppakadhadhag ko manosia. Sadn sa taw a sangkaan iyan so nganin a mapapadalm ko Qur'an agoso Hadith na sabnar a aya kiya onotan iyan na so baya a ginawa niyan. Pitharo o Allah:

  (أفرءيت من اتخذ إلهه هواه وأضله الله علي علم وختم علي سمعه وقلبه وجعل علي بصره غشاوة فمن يهده بعد الله). [الجاثية:23] –

 "Miyailayngka so taw a kinowa niyan so baya a ginawa niyan a pangintohanan iyan na piyakatharidhadhag dn o Allah a lbiron a matao ago tiyotopan Iyan so pamamakin'gan iyan agoso poso iyan ago biyaloy niyan ko pangingilayn iyan so sapng na antaonon pn i pakatoroon a salakaw ko Allah?" [45:23].

1. So kathaasobi agoso kipamangkoln ko pamikiran o mga taw. Maana ayabo a ptindgan o taw a kpit na so kpit iyan odi na so kpit iran a lompokan odi na so kpit o oonotan iyan; mlagi-lagido ribat agoso di na giyai i isa a pd a mala a pkhasabapan sa di kakhatoona o taw ko bnar agoso di niyan kakhaunoti ko ontol. Pitharo o Allah:

 (و إذا قيل لهم اتبعوا ما أنزل الله قالو بل نتبع ما ألفينا عليه ءابائنا). [البقرة:170] –

  "Ago igira pitharo kiran a onoti niyo so nganin a initoron o Allah na tharoon iran a oway ka di ayami aya onotan so nganin a kiyalayaman ami ko manga loks ami." [2:170].

Giyai tindg o mga taw a giiran ithaasob odi na ipamangkol so mga kpit iran apiyapn ribat. Amay ka pitharo kiran so bnar a rakso dalil iyan agoso kaonoti ranon na aya tharoon iran na giyai kpit ami ron ago giyai inipangdao rkami odi na inilayam rkami o miyanga oonaan ami agoso mga tatao rkami agoso mga sheikh ami agoso mga kakami ko galbk na di iran dn phangnaln so bnar.

1. So kaphagiringi ko mga kapir. Giyai isa a mala a pkhasabapan sa kapkhaadn o mga dhadhag a okitokit a kaprawata o sabaad ko mga Muslim ko okitokit o mga kapir. Marayag a kapapayag iyan siiko kadaklan ko mga ingd a Muslim imanto a masa. Phoona thothol ko Abi-Waqid Al-Laithi a pitharo iyan: "Miyonot kami ko Rasolollah [Sallallaho Alaihi Wa Sallam] ko kiyaliyo niyan sa Hunain a mga bago kamipn a miyagislam na so mga Mushrik na adna kayo iran a 'Sidrah' a giiran slaslaan ago ipsambir iranon so mga gomaan iran a pmbthowan iran sa 'Dhat Anwat' na so kiyasagadi amiron na pitharo ami ko Rasolollah [Sallallaho Alaihi Wa Sallam] ambaaln kamingka mambo sa rkami a izano rkiran a 'Dhat Anwat'." Na aya miyatharo o Nabi [Sallallaho Alaihi Wa Sallam] na: (الله أكبر! إنها السنن قلتم والذي نفسي بيده كما قالت بنوا إسرئيل لموسى: "إجعل لنا إلاها كما لهم ءاله قال إنكم قوم تجهلون"[الإعراف:138] لتركبن سنن من قبلكم). [رواه الترمذي وصححه] – "Allaho Akbar! Mataanananan okitokit a miatharo iyo, ibt ko Skaniyan (so Allah) a so ginawako na sa tangan Iyan ka lagidanan so pitharo o Banu Israel ko Musa, 'ambaaln kamingka sa pangintohanan ami sa lagid iran adna tuhan iran' pitharo iyan a, mataana pagtaw kano a daa mga plng iyan' [Qur'an 7:138] sabnara zakayan iyodn so okitokit o pd ko miyanga oonaan iyo." [At-Thirmidhi].

Sabap ko kabhabaya ko kapanayansayan agoso ka kokorang o sabot na miyapangni o Banu Israel ko Musa [Alaihis Salaam] ago giyangkoto sabaad ko mga inmpda o Nabi [Sallallaho Alaihi Wa Sallam] so di patot. Izanan a btad o mga pd a mga Muslim imanto a sabap ko bhabaya manayan-sayan agoso kakokorang o titho a knal ko Islam na ppakala ago ppakadakl so kapphananayani ko pithibarangan a okit ago kpit. 

SO INSANA O NABI [Sallallaho Alaihi Wa Sallam] A KAPAKALIDAS O MUSLIM PHOON KO NARAKA: 

Sabap ko kinilabaw kapdi ago ghagaw o Rasolollah [Sallallaho Alaihi Wa Sallam] agoso kala iyani skl ko mga omat iyan sa kapakaslang iran sa mapiya ko kapphagintaw iran sangkai a donya aya mala na sa akhirat na dapna katawan iyana mapiya a ba niyan da sogoon (so kapanagontamani ron) ago dapn mambo a marata a ba niyan da saparn. Na sabap ko katawi niyan sa madakla ptharidhadhag ko mga omat iyan ko oriyano kakhawafat iyan na inithanan iyan rkitano angkai a Hadith a pitharo iyan: 

(أوصييكم بتقوى الله عز وجل والسمع والطاعة وإن تأمر عليكم عبد حبشي، فإنه من يعش منكم فسيرى اختلافا كثيرا، فعليكم بسنتى وسنة الخلفاء الراشدين المهدين تمسكوا بها وعضوا عليها بالنواجد، وإياكم ومحدثات الأمور، فإن كل محدثة بدعة وكل بدعة ضلالة وكل ضلالة في النار). [النساء و الترمذى]

“Ipagosiyat akn rakno so kikalkn niyo ko Allah A Maporo ago Mala (sa titho a kalk) agoso kapamamakin’ga ago kaunoti apiyapn aya dato iyo na oripn a taw sa Habasha ka mataan dn a sadn sa mamboway rkano na tangkd a khaylay niyan dn so kapsosopaka a madakl na aya niyo kdga so (Sunnah) okitokit akn agoso (Sunnah) okitokito mga kholafa ar-rashidon al-mahdiin, kapti niyo sa mabhagr ago kkbn niyo ron so mga bhagangiyo [koniya ko katksaun sa mabagr], ago pananggilai niyo so kambabagowi ko btad (o agama sa di ron pd) ka mataana so kambabagowi ron na Bid’ah na so langowana Bid’ah na kadhadhagan na so langowana kadhadhagan na khatago ko Naraka.” [An Nisai ago At-thirmidhi].   

  ALLAHO A’LAM –