SO BANDINGAN KO SURGA AGO SO MGA BALASYAN

SO BANDINGAN KO SURGA AGO SO MGA BALASYAN

By: Alim, Hassanor Bin Maka Alapa.

Innalhamda lillāhi nahmaduhu wa nastaīnuhu wa nastagfiruh, wa na’ūdubillāhi min shurūri anfusinā wa sayyiāti a’mālinā, man yahdihillāhu falā mudhillalahu, wa may yudhlil falan tajida lahu waliyyan murshidā, wa ash’hadu allā ilāha illallāhu wahdahu lā sharīka lahu, wa ash’hadu anna Mohammadan abduhu wa rasūluh, Allāhumma salli wa sallim wa bārik alā Mohammadin sallallāhu alayhi wa salallama wa alā ālihi wa sahbihi wa manihtadā bihad’yihi ilā yawmidd dīn wa ba’du:

Fayā ibādallāh, Yaqūlul Haqqu Tabāraka wa Ta’ālā fil Qur’ānil Karīm:

Manga oripn o Allāh, aya bandingan tano imanto na so ptharoon a sorga ago so madadalm on a manga balas o Allāh sw" ko oripn iyan a miangongonotan on ko katatago iyan ko doniya.

Giankai a sorga na skaniyan i rinayagan ago pimbolawasan o limo o Allāh sw" a mapmbagian o manga oripn iyan a miaratiaya on, go skaniyan i aarapn o manosiya a ron makapagingd ko oriyan o kapatay niyan.

Gankanan a sorga a babantakn tano na aya ingaran iyan ko basa Arab na so al Jannah, a aya maana niyan ko basa na so asinda a pd sa korma odi na manga pamomolan, a giankoto a basa na phoon ko galbk a Janna a aya maana niyan na somiapng, sabap sa so asinda na igira miakarimpoong so manga kayo niyan sa mamamalampak so manga sapak iyan na pkhasapngan iyan so lopa ago so matatago ko atag iyan ago pkharnding iyan so ranti o alongan oba pamantk ko sold iyan. Sabap roo na bithowan o basa arab so sorga sa Jannah.

So pman so mababantak a maana sankanan a sorga a aya tano bandingan imanto na skaniyan so ingd a so inithiakap o Allāh sw" ko manga oripn iyan a miamananggila ko lalangan iyan, sa balas iyan kiran ko kapiya o paratiaya iran ago so manga galbk iran a manga pipiya.

Giankanan a kasorgaan na madakl a piakanggolalan on o Qur’an a manga ingaran a pd on so: al Jannatul Ma’wā (so sorga a khadrangan) Jannatu Adn (o sorga a khatatap on so taw niyan), Dārul Khulūd (so ingd a tatap) Jannatul Firdaws (so sorga a maporo), Dārus Salām (so ingd o kalilintad), Dārul Muqāmah (so ingd a babalingan), Jannātun Na’īm (so sorga a limo) al Maqāmul Amīn (so ingd a somasarig a lomilintad).

Miaaloy ko Qur’an a so blangan iyan na so dn so blangan o manga langit ago so lopa.

Miapanothol a so Nabi saw" na iniiza on so darpa o naraka amay ka so sorga na aya kablang iyan na so manga langit ago so lopa? Na aya inismbag iyan na: Miasotisoti so Allāh sw", anda so kagagawii igira miakaoma so kadawndaw.

Manga Oripn o Allāh, gianan so sorga a aya kiniropaan on o Rasūlullāh saw" ko madadalm on a kamapiaan o oripn, na skaniyan so daa mata a ba on miakailay, ago daa tangila i ba on miakan’g, ago da pn mititik sa poso a manosiya.

Manga Oripn o Allāh, aya manga taw ko sorga na so taw a miaratiaya a initindg iyan so manga simba ko Allāh sw" ago mipharangay sa manga pipiya. Pitharoo Allāh sw" a:

{ Mataan a so Allah na piamasa niyan ko miamaratiaya so manga ginawa iran ago so manga tamok iran sa rk iran so sorga, a gii siran makithidawa sa lalan ko Allah, sa pphakabono siran (sa ridoay a kafir) ago pkhabono siran (pkhasahid siran) kapasadan rkaniyan a Allah a bnar a misosorat ko Tawrah ago so Injil ago sii ko Qur’an, na sa taw a itoman iyan so kapasadan iyan ko Allah, na kababayaan iyo so dagangan iyo a so piphasa niyo skaniyan, a gioto na skaniyan so kapagontong a mala} (at Tawbah 111).

So manga limo a madadalm ko Sorga:

Iniropa o Allāh sw" so sorga sa mataan a so manga limo a madadalm on na tatap ago lalayon, na so kapipiya ginawa on na di dn khapos, ago langowan a madadalm on a mapiya na daa isipan iyan a tanto a madakl.

So manga lawas a ig iyan na khizosolapay, adn a manga lawas a ig on a tabang a ig, a di kharmbis, go adn a lawas a ig on a pd sa gatas a di dn khaalin so taam iyan, ago adn a lawas a ig on a arak a ragiray sa bakrng a di phakaibg, go adn a lawas a ig on a tnb a linang.

Giankoto a manga lawas a ig na pphamanoga ko kababaan o manga marigay, ago kadadalman sa pizoson a manga onga a sapad ago manga sapo a papanok.

So manga rizqi ko sorga na makapzasapowa sa manga bontal ogaid na midabida sa taam ko kapiya niyan. Pitharoo Allāh a mapor ago mala a :

{Go panothol anka ko siran oto a miamaratiaya ago minggalbk sa manga pipiya a mataan a adn a bagian iran a manga kasorgaan a pphamanoga ko kababaan iyan so manga laws a ig, a oman siran on rizkhian sa pd sa onga a sapad a pagpr na tharoon iran a giai so inirizki rkitano sa miaona, sa iniidang kiran sa makaphlagilagid sa bontal, go adn a bagian iran ko sorga a manga karoma a manga soti, ago siran ko sorga na tatap siran on sa dayon sa dayon (al Baqarah 25),

Manga Oripn o Allāh, aya manga nditarn ko sorga na manga sotra a pd sa bayobayog ago manga kakapal, na aya manga imbolawan iran on na manga bolawan ago manga montiya.

Skaniyan a sorga na iniropa sa manga bilik a so kaporoan iyan na bilik a pananagombalayin a so manga lawas a ig na pphamanoga ko kababaan iyan.

So manga taw ko sorga ago so manga karoma iran na madadalm siran sa manga sironsironga a khiddrang siran ko manga kantir. So manga karoma iran a manga bai a miamakasorga na pagadnn siran o Allāh wa" sa salakaw a kaadn a manga babay a da pangatatamaki a manga ngongoda i omor, ago so Allāh sw" na magadn sa manga midadari a manga tataid a maphamangaroma o taw a phakasorga a datar siran kon o kapoti o orak a manok a matotonkop a manga soti a di siran khaoma a haydh ago nifas, a tanto a manga pipiya i parangay ko manga karoma iran a manga mama.

So manga taw ko sorga na plowasn o Allāh sw" so kadnki ago so kasiig ko manga poso iran a magariari a khiddrang siran ko manga kantir. Da dn a dokaw a khisogat kiran ko sorga, ago di siran dn phakaliyo ago di siran phakaawa ko sorga sa dayon sa dayon.

Da dn a khan’g iran ko sorga a sowara a marata, aya bo a pkhan’g roo na so podipodi ko Allāh sw" ago so salam o manga malaikat ko miamaratiaya ago so gii ran kazasalama ago so manga pd iran a manga taw ko sorga. Pitharoo Allāh sw" a:

Go so manga malaikat na pphamanold kiran ko oman i pinto, sa gii ran tharoon a salam rkano sabap ko nganin a pizabar iyo. Na miakapiapiya so ingd a khabolosan a so sorga (ar Ra’d 23).

Manga Oripn o Allāh, miaaloy ko hadith a pianothol o al Bukhari ago so Muslim ago so at Tirmidi a so Nabi saw" na pitharo iyan a: Aya paganay a lompokan a phakasold ko sorga na makaproropaan ko bontal o olan ko kagagawii a kiambiring iyan, oriyan iyan na makatondog kiran so datar o bitoon a masigay sii ko langit ko kasindaw, a siran oto na di siran phakatiti ago di siran phakaodo, ago di siran phanoda ago di siran phakasnga sa manga langog, a aya manga salday ran na bolawan, na aya ating iran na so kastori, na aya ikhakamotan iran na so mamot a borok (al Alwah), a aya manga karoma iran na so manga midadari, sa so kiaadna kiran na datar o bontal o ama iran a Adam a nm polo hasta a kaporo iran.

Manga Oripn o Allāh, so manga limo ko sorga na maporo a di so kiropaan on o pamikiran, sa so khipropaan tano ron na matag abayabayan ko manga limo ko doniya.

Pianothol o al Bukhari a miakapoon ko Abu Hurayrah a so Nabi saw" na pitharo iyan a: Pitharoo Allāh sw" a: Inipagtad akn ko manga oripn akn a manga salih a nganin a da dn mailay a mata ago da man’g a tangila ago da mititik sa poso a manosiya (so kapiya niyan) batiaa niyo o khabayai niyo so katharoo Allāh sw" a: 

فَلاَ تَعْلَمُ نَفْسٌ مَا أُخْفِيَ لَهُمْ مِنْ قُرَّةِ أَعْيُنٍ
Daa ginawa a ba niyan katawi so nganin a piagma kiran a pd sa limo 
a iphakapiaa ginawa. (as Sajdah 17).

Da dn a plagidan o limo ko sorga ago so limo ko doniya inonta bo ko manga ngaran, ogaid na so kamamataani ron na da dn a ba iran plagidi.

Manga Oripn o Allāh, aya pithamanan a mapiya a limo ko sorga na so kailaya o oripn ko Kadnan iyan a Rabbul Alamin, ago so kipmbitiarain iyan on, ago so kakhakowaa niyan ko kasosoat iyan a Rabbul Alamin. Pitharoo Allāh sw" a: 

وُجوُهٌ يَوْمَئِذٍ نَاضِرَةٌ , إِلَى رَبِّهَا نَاظِرَةٌ
Adn a manga paras sa alongan oto a makalalangas, a sii ko Kadnan iyan 
na phagilayin iyan (al Qiyamah 22).

Miakapoon ko Suhayb a mataan a so Nabi saw" na pitharo iyan a: Amay ka makasold so manga taw o sorga ko sorga, na tharoon o Allāh sw" a: Ba adn a khabayaan iyo a shayi a ipagoman akn rkano? Na tharoon iran a: Ba nka da pakapotia so manga paras ami? Ba kami nka da pakasolda ko sorga? Ba kami nka da pakalidasa ko naraka? Na isogo o Allāh sw" a misayat so rnding, na daa minibgay kiran a shayi a lawan a pkhababayaan iran a ba niyan kalawani so kailaya iran ko Kadnan iran. Oriyan iyan na biatiya iyan so katharoo Allāh sw" a: 

لِلَّذِينَ أَحْسَنُوا الْحُسْنَى وَزِيَادَة (يونس 16). 
Bagian o siran oto a miphiapiya so pithamanan a mapiya (a so sorga) ago 
adn a oman iyan (a so kakhailaya iran ko Allah)(Yunus 16).

Miakapoon ko Jarir Bin Abdillah a pitharo iyan a: Liangag o Rasūlullāh saw" so olan ko kagagawii a kiambiring iyan na pitharo iyan a: Matatankd a khailay niyo so Kadnan iyo (ko sorga) sa sandng a kailay sa datar o kapkhailaya niyo sankai a olan, sa di kano dn pzanka ko kakhailaya on, na amay ka khagaga niyo a di kano makalpas sa sambayang ko da pn kasbang o alongan ago sii ko da niyan pn kasdp na nggolawlaa niyo. Oriyan iyan na biatiya iyan so: 

وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ الْغُرُوبِ (ق 39).
Go zambayang ka ko da pn kasbang o alongan ago sii ko da niyan pn kasdp (Qaf 39).

So pman so kailaya ko Allāh sw" o oripn sii ko doniya na da dn manggolawla. Piangni o Musa a mailay niyan so Kadnan iyan, na so kiaphayag o tihaya o Allāh sw" ko lopa na minilamps so Musa a pipinsann sa da niyan dn magaga o ba niyan mailay so Allāh sw".

Manga Oripn o Allāh, so sorga na ingd a tatap a di dn khada ago daa kaposan iyan, sa datar oto mambo so naraka a da dn a taman iyan sa so manga taw sankanan a dowa a darpa na tatap siran on a da dn a ba iran on kakhada sa dayon sa dayon, sa da dn a kapatay roo ago daa kadadas on.

Pd a ropaan o sorga ago so naraka a so sakataw a taw a pithamanan a maroromasay ko doniya na o saldn ko sorga sa makaisa na da dn a katadman iyan a karomasayan a kiasagadan iyan ko doniya, na so mambo so pithamanan a mindayadaya ko doniya a somiawit on na o saldn ko naraka sa sasindot on na da dn a katadman iyan a mapiya a kiasagadan iyan ko doniya, gianan i tarotop a ropaan o sorga ago so madadalm on a limo, ago so naraka ago so madadalm on a siksa ko kiniropaan on o sabdan o Rasūlullāh .

Manga Oripn o Allāh, pangnin tano ko Allāh a balowin tano niyan a pd ko manga taw a pphamakin’gn iran so katharo na phagonotan iran so lbi ron a mapiya.

وَأَقُولُ قَوْلِي هَذَا وَأَسْتَغْفِرُ اللهَ لِي وَلَكُمْ وَلِسَائِرِ الْمُسْلِمِينَ مِنْ كُلِّ ذَنْبٍ فَاسْتَغْفِرُوهُ إِنَّهُ هُوَ التَّوَّابُ الرَّحِيمُ
Wa aqūlu qawlī hādā wa astagfirullāha lī wa lakum wa lisāiril Muslimīn min kulli dambin fastagfirūhu innahu Huwat Tawwābur Rahīm.