MGA SIFAT O MGA AHLUSSUNNAH WAL JAMA'AH BY: ATAH P. IBRAHIM

MGA SIFAT O MGA AHLUSSUNNAH WAL JAMA'AH BY: ATAH P. IBRAHIM

1. So kakhpiti go kaonoti ko mga katharo o Nabi "saw" sa masoln na go mapayag. < knaba siran lagid o mga munafik a sa masoln na ikakagowadiran so agama, go knaba siran lagid o mga shi'ah a goso mga pd a myangadadadag a sosopakniran so mga katharo o Nabi "saw" >

2. Aya kokowaaniran a ladiyawaniran sii ko paratiyaya, panarima na go mga galbk a mapya na... so miyanga oonaaniran "salaf" a siran so mga Muhajirin go mga Ansar "mga Sahabah ra" kagya siran i mga tao a siyabot sa mapiya ko agama ka minipagoyaga iran so Nabi "saw" go kamamasaaniran so kinituron o Qur-an na siran i mga tao matao ko okit okit o Nabi "saw" < knaba siran lagid o mga tao a myangadadadag a aya tindgiran na siran i matao a diso mga Sahaba "ra" na pimbabagowaniran so Agama na go piyana-wil iran so Agama sa Ta-wil a ribat na kyasaban sa kyapokasiran ko tindg o Ahlussunnah >

3. 0onotaniran na go paparatiyayaaniran so ini thanan o Nabi "saw" sii ko kiyatharoa niyanon sa [ paliyogat rkano so kakhpiti ko Sunat akn, go so Sunat o Khulafa Arrashideen "Abubakr, 0mar, 0thman go Ali ra" sa obaniyo kabokai, k'khbn yo ron so mga bagang yo, go pananggilai nyo so phangibago a kpit, ka mataan a lango a phangibago "bid'ah" na kadadagan. ] pitharo i Tirmidhi: mapya a Hadith

4. Sslaaniran na go rerespitowaniran so Qur-an a go Hadith, sa aya iran babalowin a Dalil ko kaphagintawiran na go so kaphagagama iran, kagya katawaniran a so Qur-an na katharo o Allah, na dadn a makalawan sa katitho ko katharo o Allah na goso katharo o Rasulollah "saw" < knaba lagid o sabaad a pkhamasaan tano imanto a aya iran pakapangongondayaan na so mga pamikiraniran na go so mga baya a ginawa iran sii ko kaphagagama na miyadadag siran na aypn a tangkapiran na siran i maka oontol >

5. Maiisaisa siran ko kawnoti ko Qur-an a go Hadith, maiisaisa siran ko kathatabangai ko ko mapiya na go so kalk ko Allah, na gyanan i kyabthowi kiran sa Ahlussunnati wal jama'ah kagya a sisiyapniran so Sunnah o Nabi "saw" a go maiisaisa siran ko tindg iran a matitho.

6. Aya babalowiniran a taks o mga kokomaniran na so Qur-an a go Hadith a go so IJMA' "pyamagayonan o mga ala a ulama" sa diiran plawanan sa mayto bo a katharo, diiran phamagalin'n, < knaba lagid o pd a mga dadag a p'phagalin'n iran so maana o mga ayat na go mga Hadith ka p'phaka ay0n'niran ko baya a ginawayran na go sii ko pamikiraniran a marshik a pamikiran, go p'phawalniran so IJMA' a pyagay0nay0nan o myanga uuna a mga ala Ulama ka ankiran di khataratanto so kariribat o tindgiran >

Balowin tanu a mga ginawa tanu a mga oontol a tao, balowin tano a mga ginawa tanu a mga tao a maapd ko lump0kan o Ahlussunati wal jama'ah ka antano makaligtas ko rarangit o Allahu Subhanahu wa Ta'ala...

Wassalamu 'Alaikum w.w.